“On-call doctors” gipangita sa Kapitolyo

CEBU, Philippines - Aron madugangan ang workforce sa tanang provincial ug district hospitals, ang mga medical doctor sa probinsiya ipaubos sa “on-call” status. Tumong sa maong lakang nga mahatagan og tukmang serbisyo sa panglawas ang mga konstituwente sa kalungsuran ug siyudad sa probinsiya.

Niadtong Lunes giaprobahan sa Hunta Probinsiyal ang resolusyon nga giduso ni Bokal Christopher Baricuatro sa pagpanawat og mga on-call physicians alang sa medical manpower diha sa 16 ka tambalanan sa probinsiya.

Matud ni Baricuatro nga ang mga doktor gitugotan nga makatrabaho isip mga contractual ug non-exclusive basis.

Ang mga tambalanan sa probinsiya nagkinahanglan og mga qualified license ug competent nga medical practitioner nga makaatiman sa mga gikinahanglang serbisyo diha sa mga tambalanan. Ang pag-hire og mga personnel usa ka pagpangandam sa pag-upgrade sa upat ka provincial hospitals nga nahimutang sa dakbayan sa Bogo, Danao ug Carcar ug sa Lungsod sa Balamban. - /DILT) (BANAT NEWS)