Sinkholes sa dakbayan gipangita sa MGB

CEBU, Philippines - Gi-survey sa mga tinugyanan sa Mines and Geosciences Bureau kuyog ang mga sakop sa Cebu City Disaster Risk Reduction and Management Office (CCDRRMO ang mga barangay sa siyudad aron mahibaw-an kung dunay sinkhole.

Nunot niini giawhag sa pangulo sa CCDRRMO, Nagiel Bañacia, ang katawhan nga dili maalarma kun duna’y makita nga mga geologists ug engineers sa ilang dapit.

Matud ni Bañacia nga tibuok buwan sa Marso mohimo sa ilang survey ang MGB-Manila ug duna’y mga panahon nga mobisita sila sa mga pribadong luna maong nanawagan siya nga tugutan sila nga makasusi sanglit alang man sab kini sa kaayuhan sa tanan.

Base sa mapa sa MGB duna’y mga sinkholes sa siyudad gumikan usab sa klase sa yuta nga sagad anapog.

Unang gisusi ang mga bukirang barangay sama sa Sirao nga nihulpa ang yuta tungod sa mga pag-uwan nga nasinati. Human sa assessment, ipresentar sa MGB sa siyudad ug ang kagamhanan na maoy mopakita ug magpahibawo sa katawhan kun asa ang nakita nga sinkholes.

Gihulagway ni Bañacia nga importante ang gihimo sa MGB sanglit makatabang kini sa development plan ug hazard map sa siyudad aron mahibaw-an kung asa ang mga sinkholes ug malikayan ang kadaut. (BANAT NEWS)