Loot mokiha sa namasangil
CEBU, Philippines - Mokiha si Daanbantayan Mayor Vicente Loot sa mga namasangil nga nalambigit siya sa ilegal nga drugas gawas ni Presidente Rodrigo Duterte kinsa dili makiha.
Kini human si Duterte namahayag nga wala’y mapasaka nga kaso batok ni Loot gawas kung madakpan kini dihadiha nga nagkupot og shabu.
Matud ni Loot nga ang pamahayag sa presidente nagpasabot lang nga sayop ang nadawat niini nga impormasyon nga hinimohimo lang sa iyang kaatbang sa politika.
"In war, you die only once but in politics, you die many times, and I died many times already and I am resurrected," matud ni Loot.
Wala hinoon gibutyag ni Loot kung kinsang mga tawhana ang iyang pasakaan og kaso.
Si Loot nipadayag nga apektado na ang ilang negosyo tungod sa maong pasangil.
"Di na mi maka-loan sa bangko, unya ang among deposit di sad dawaton sa bangko without clearance sa AMLAC (Anti-Money Laundering Act Council)," matud niya.
Atol sa pagbisita ni Duterte sa Sugbo sa groundbreaking ceremony sa Cebu-Cordova Link Expressway niadtong Huwebes, gipangutana sa mga tigbalita ang estado nilang Loot, kanhi Cebu City mayor Rama ug negosyante nga si Peter Lim kinsa iya gitumbok nga mga drug protectors.
“It was (an intelligence) report, ang sabi ko. Unless they are caught in possession of shabu, then there are no cases (against them),” matud ni Duterte. (BANAT NEWS)
- Latest
