CPDRC butangan pagbalik og polis
CEBU, Philippines - Sa pagbalik sa prebilihiyo sa dalaw karong Lunes, magsugod na usab pagbantay og balik sa Cebu Provincial Detention and Rehabilitation Center (CPDRC) ang Provincial Public Safety Company (PPSC).
Matud ni Bobby Legaspi ang Officer-in-Charge sa CPDRC nga 20 ka sakop sa PPSC gikan Cebu Provincial Police Office (CPPO) ang motabang sa pagbantay ug inspeksyon sa mga dalaw sa CPDRC.
Hinuon ang PPSC anha ra may entrance sa jail facility ug dili basta-basta makasulod didto mismo sa sulod sa jail facility.
“Of course, if they come into the building, they (PSSC) need to be escorted or any agency, they need to be escorted by personnel from CPDRC,” matud ni Legaspi.
Ang PPSC gihangyo sa Kapitolyo nga mobalik pagbantay sa CPDRC human nga di moubos 80 ka mga cellphones, illegal nga drugas ug uban pang kontrabando ang nasakmit na usab gikan sa mga priso atol sa operation greyhound nga gipahigayon sa Philippine Drug Enforcement Agency (PDEA-7) ug ingon man sa kapolisan sa miaging semana.
Niadtong miaging tuig, ang PPSC gipabantay sa CPDRC apan gihunong sila human sa sunod-sunod nga kontrobersiya nga miresulta sa pag- resign sa consultant ug warden ug pagkalambigit sa pipila ka mga prison guards sa pagpasulod sa kontrabando.
Si Legaspi nagkanayon, ibalik nila karong Lunes ang sistema nga una nilang gipatuman sa pagpasulod sa mga bisita sa CPDRC, tulo ka inspeksyon ang agian sa modalaw. - /EIM) (BANAT NEWS)
- Latest
