Pag-umangkon hubog, uyoan gidunggab

CEBU, Philippines - Nakabaton og samad dinunggaban sa iyang kilid ang 51-anyos nga uyoan kinsa gidunggab sa iyang pag-umangkon nga hubog alas 10 pasado sa niaging gabii sa Himbabawod, Libertad, Dakbayan sa Bogo.

Si Police Officer 2 Gabriel  Russell sa Bogo City Police Station niila sa biktima nga si Leon Sayot Lepasana, biyudo ug ang nagdunggab mao si Edwin Mangubat Sayot, 34, nagpuyo sa maong dapit.

Matud ni Russell nga nahiagi ang biktima sa tindahan nga giinoman sa suspek ug gisundan kini nga naglakaw padulong pauli sa ilang panimalay.

Dihang padulong na sa pagsulod sa iyang panimalay ang biktima, kalit kining gidunggab sa pag-umangkon gamit ang kutsiyo sa luyo nga bahin niini.

Ang biktima nga nakalingi dali nga nakalihay apan naigo gyud ang kilid ubos sa iyang ilok apan igo lang nga natapsingan ug dali kining gidala sa tambalanan.

Nidagan ang suspek pauli sa ilang panimalay apan nadakpan kini sa mga polis nga nitubag sa maong alarma. (BANAT NEWS)