Tigpalit og uway gitigbas patay

CEBU, Philippines - Patay ang usa ka negosyante nga namalit og gagmay nga uway nga gamiton sa pagpanggama og basket sa bukirang bahin sa Barangay Dungga, Dakbayan sa Danao human kini gitigbas alas 6 pasado sa niaging     gabii.

Si Senior Police Officer 1 Arnold Labine sa Danao City Police Station niila sa biktima nga si Filemon Matugas Parrot, 65-anyos, biyudo nga taga Barangay Malapoc sa nahisgutang dakbayan.

Ang suspek giila ni Labine nga si Arcenio Oliverio, hingkod ang panuigon nga nagpuyo sa maong dapit.

Matud ni Labine nga sa gihimo nilang imbestigasyon ilang nasuta nga kanunay nga magsuroyan sa maong dapit ang biktima alang sa pagpamalit og mga uway gikan sa pipila ka molupyo.

Dugang pa niya nga pipila ka nakasaksi sa maong hitabo nga ilang gisukitsukit niingon nga dihang wala pa nahitabo ang pagpanigbas ilang namatikdan nga nagkalalis ang biktima ug ang suspek.

Si Labine niingon nga wala hinuon matataw ang hinungdan sa mao nilang panaglalis apan ilang gituohan nga may kalambigitan kini sa negosyo sa biktima.

Nunot sa mainiton nilang panaglalis ang suspek nga nagtakin na daan og sundang sa iyang hawak ang kalit lang niibot niini ug gitigbas ang biktima sa makadaghang higayon.

Nakabaton og samad tinigbasan ang biktima sa iyang kamot ug mga tiil, abaga ug ulo nga nakaingon sa iyang hinanaling kamatayon.

Human sa maong pagpanigbas dali usab nga nakasibat pahilayo sa maong dapit ang suspek ug wala kini naabti sa mga barangay tanod. (BANAT NEWS)