Cebu-Cordova bridge sugdan sa hulyo

CEBU, Philippines - Gilauman nga moabot lima ka libo ka trabaho ang mahatag ngadto sa mga Sugboanon sa pagtukod sa ikatulong taytayan nga magdugtong sa Dakbayan sa Sugbo ug Lungsod sa Cordova.

Kini ang gipahibawo ni Manny Pangilinan, chairman sa Metro Pacific Tollways Development Corporation, nga maoy mopatukod ug modumala sa taytayan.

Matud niya nga kung operational na ang taytayan nga tawgon og Cebu-Cordova Link Expressway (CCLEX) nga mahuman sa 2020, ang lokal nga kagamhanan makakuha sab og income gikan sa maong proyekto.

Si Cebu City Mayor Tomas Osmeña nagkanayon nga ang maong proyekto maoy labing dako nga economic impact dili lang sa Cordova lakip na usab sa tibuok Pilipinas.

Matud ni Osmeña nga makamugna og daghang benepisyo ang maong proyekto sa turismo ug sa ekonomiya sa Sugbo.

Ang groundbreaking ceremony kagahapon gitambongan ni Presidente Rodrigo Duterte kinsa nagkanayon nga ang maong proyekto nagpasabot lang kini nga padayon ang paglambo sa Sugbo sunod sa Manila.

"Ang Cebu is exploding actually, sumusunod sa Maynila talaga," matud ni Duterte. Ang 8.2 ka kilometros nga CCLEX gastuhan kini og P27 bilyones sa MPTDC ug walay gasto ang gobiyerno.

Gilauman nga masugdan ang konstruksyon sa Hulyo karong tuiga.  

"After 35 years, the people of Cebu will own every inch of this bridge and every kilometer of the toll ways," matud pa ni Manny Pangilinan, ang tsirman sa Metro Pacific Tollways Development Corporation.

Siya midugang nga mas dako ang potensyal sa kalamboan sa Mactan ug Cebu kun madugangan pa kini og duha pa ka taytayan. Matud niya iyang napanglantawan nga dili maabtan og 20 ka tuig masugdan usab ang ikaupat nga taytayan.

Siya miingon nga kinahanglang aduna nay mga plano nga masumpay pinaagi sa mga taytayan ang Cebu, Bohol Eastern Visayas gikan Sorsogon padung sa Samar-Leyte, Leyte-Bohol, Bohol-Cebu, Cebu-Negros ug Negros-Panay aron mamahimo kining usa ka dakong economic  region. Le Phyllis F. Antojado ug  Mitchelle Palaubsanon (BANAT NEWS)