PNP manakop na sab og pushers

CEBU, Philippines - Gibutyag ni Police Regional Office-7 director Noli Taliño nga nangita na sila og mga polis nga molangkob sa pagamugnaon nga Drug Enforcement Unit (DEU) nga tahasan sa paghimo og mas aktibo pa nga kampanya batok sa mga tigpayuhot og gidiling drugas.

Matud ni Taliño nga hashasan nila pag-ayo ang mga polis nga himoong sakop sa DEU tungod sa kamandoan ni PNP Chief Ronald “Bato” dela Rosa nga kadto ra nga mga wala malambigit og kaso maoy ipasakop sa bag-ong police unit nga tugotan sa paghimo’g kampanya batok sa mga drug lords ug pushers.

Nagpasabot kini nga dili gihapon tanang polis ang makahimo og kampanya batok sa mga malapason sa balaod sa drugas. Wala mobutyag si Taliño kun pila ka polis ang ipasakop nila sa pagamugnaong grupo.

Ang kamandoan ni Dela Rosa nga magmugna pagbalik og special units sa kapolisan nga tugotang makahimo og kampanya batok sa gidiling drugas, gihangop dayon sa mga opisyal dinhi sa Sugbo.

Sila si Gobernador Hilario Davide III ug Cebu City Mayor Tomas Osmeña nalipay nga mobalik na ang kapolisan sa kampanya batok sa mga tigpayuhot og drugas kay ang Philippine Drug Enforcement Agency (PDEA) kuwang kaayo og mga sakop.

Nalipay usab kaayo si Talisay City Mayor Eduardo Gullas kay posible nga sa pagbalik sa Operation Tuktok Hangyo (Tukhang) mas agresibo na ang ilang kampanya batok sa mga tawo nga nalambigit sa gidiling drugas. Matud ni Davide ug Osmeña nga kinahanglang magtinabangay ang PDEA ug kapolisan paghimo og operasyon. Si Taliño miingon nga padayonon nila ang paghimo og case-build-up sa mga tawo nga nahilambigit sa negosyo sa drugas. “Hindi na tayo babalik sa tukhang operation, we will be more aggressive against illegal drugs,” matud ni Taliño. Gitataw ni Taliño nga ang PDEA gihapon ang lead agency sa kampanya batok sa drugas. Si PDEA Regional Director Yogi Felimon Ruiz mihangop usab sa pagbalik na sa kapolisan sa kampanya batok sa mga drug pushers ug drug lords. Si Cebu PNP provincial director Eric Noble miingon nga daghang mi-report kanila bahin sa mga nagpayuhot og drugas ug makig-alayon sila niini sa PDEA.

Ang kapolisan gipahunong sa paghimo’g operasyon sa mga nalambigit sa drugas human nga dunay pipila kanila nga nasakpang nalambigit og binuang. Apan nabantayan nga sukad gihunong ang Oplan Tukhang, mibalik ang operasyon sa mga drug lords ug pushers.

Apan si Mayor Gullas miingon nga bisan og gipahunong ang kapolisan sa kampanya batok sa drugas, apan gipapadayon niya kini sa pagkuha og inpormasyon sa mga ilegalista.

Si Gullas miingon nga maglisud gyud ang PDEA kun sila ra ang saligan sa paghimo’g kampanya batok sa mga tigpayuhot og drugas mao nga nalipay siya nga magmugna na ang kapolisan og anti-drugs unit.

Sa laing bahin, si Davide mihural na atubangan ni DILG Secretary Ismael Sueno  isip bag-ong chairman sa Regional Peace and Order Council (RPOC) sa rehiyon-7. Gani, ang mga chairman ug vice chairman sa mga RPOC sa Visayas nagtigum na kaniadtong Biyernes didto sa Iloilo City ug nagkauyon sila nga hingusgan nila ang kampanya batok sa drugas sa tagsa-tagsa nila ka lugar. Apil sa nahisgotan sa tigum nila ni Davide mao ang lista sa mga opisyal nga nalambigit sa gidiling drugas nga gihatag ni Presidente Duterte ngadto sa DILG. Gituki usab nila ang sugyot nga ang kabalayan sa mga wala malambigit sa drugas butangan og sticker nga drug free. Christell Fatima M. Tudtud, Brenda D. Batuto, Gabriel C. Bonjoc ug Brenda D. Batuto (BANAT NEWS)