Opisyales sa tambalanan gireklamo

CEBU, Philippines - Mga opisyal sa Juan B. Dosado Memorial Hospital sa Lungsod sa Sogod gipasanginlang namugos og kolekta og usa ka libo ka pesos sa matag kawani nila diin giingong ihatag kini ngadto sa mga job order employee.

Sa milabay'ng buwan usa ka residente ang mi-post sa social media sa iyang reklamo. Iyang gibutyag nga aduna siyay paryente nga nagtrabaho sa maong tambalanan ug giingong ang maong pagkolekta gipaluyohan sa hospital accountant ug chief doctor.

Nagdumili sa pagpahingan ang maong residente kinsa mibutyag sab nga ang kawani nga dili mohatag ipatawag sa nahisgutang mga opisyal ug kasab-an. Subay niini, ang hepe sa tambalanan gipaesplika sa hepe sa Provincial Health Office, Dr. Rene Catan.

Basi sa report gikan sa tambalanan nga niadtong Disyembre 16, 2016  moabot ngadto sa P32,999.40 ang tanang cash bonus nga madawat sa matag organic nga kawani sa probinsiya nga naglakip sa mga kawani sa maong tambalanan.

Ang mga kawani sa maong ospital nagplano sa pagpanghatag og groceries nga nagkantidad og P521.74 ngadto sa ilang mga contractual nga kawani.Ang administrative officer mipahibawo sa ilang plano ngadto sa hepe sa ospital kinsa miuyon sab nga ang matag regular employee, mag-amot og tag P1,000 alang sa maong katuyoan.

Apan ang asawa sa usa ka kawani giingong wala mouyon sa plano, hinuon ang bana niini nga kawani mihatag og P1,000 human sa mga nahitabo nga lalis hinungdan nga niadtong Enero 9, 2017 gibilin sa administrative officer ang kwarta sa gwardiya aron mauli kini. Apan ang maong kawani wala modawat og balik sa maong kwarta hinungdan nga ang maong kwarta anaa hangtud karon sa mga gwardiya sa tambalanan.

Si Catan mirekomendar nga ang maong reklamo mabasura ug masirado na kay wala kini merito. Mipahimangno sab kini sa mga opisyal sa tambalanan nga magmatngon kanunay ilabi na kun may kalambigitan na sa pinansiyal sa mga kawani. (BANAT NEWS)