Call center agent patay sa disgrasya
CEBU, Philippines - Patay ang usa ka lalaki nga call center agent ug nalandig sa tambalanan ang iyang kauban nga call center supervisor human misampak sa kasugat nilang Ceres Bus ang ilang gisakyan nga motorsiklo diha sa national highway, sa Brgy Liloan sa Lungsod sa Santander pasado alas 5 niadtong nakalabay nga hapon.
Nakabsan sa kinabuhi sulod sa tambalanan si Ivan Opoc, 20, nga taga lungsod sa Consolacion, samtang nalandig sa tambalanan ang iyang back rider ug si Gwynne Flores, 20, nga taga Pelaez Street, ning Dakbayan sa Sugbo.
Matud pa ni Police Officer 1 Arturo Ricahuerta sa Santander Police nga nahinabi sa Banat News gikan sa Dakbayan sa Sugbo ang Ceres bus samtang katagbo sab niini ang motorsiklo nga gisakyan sa mga biktima nga gimaneho ni Opoc.
Sigun pa sa mga nakakita sa hitabo nga nag zigzag-zigzag sa dalan ang motorsiklo sa mga biktima unya midasmag sa kasugat nga bus.
Dali nga gidala sa Oslob District Hospital ang mga biktima apan paglabay sa halos usa ka oras nakabsan sa gininhawa si Opoc.
Ang drayber sa Ceres Bus nga si Willmard Drillon, 30, boluntaryo nga mitahan sa iyang kaugalingon ngadto sa kapulisan.
Nagpaabot pa ang kapolisan sa pamilya sa mga biktima kun mopasaka sila og kaso batok sa drayber. (BANAT NEWS)
- Latest
