Koreans nabalaka sa giingong mafia

CEBU, Philippines - Gikasubo sa Korean community nga nagpadagan og mga negosyo sa Sugbo ang pagtumaw sa mga taho labot sa gitawag og Korean mafia tungod sa epekto niini sa ilang mga negosyo.

Si Son Byung Cheong nga maoy executive director sa Mactan Isla Resort and Casino sa Dakbayan sa Lapu-Lapu sa  iyang pamahayag hugtanong nihimakak nga adunay Korean mafia sa Sugbo tungod kay tumong nila mao ang pagnegosyo.

Matud niya nga sukad sa pagtumaw sa mga taho labot sa Korean mafia sa Sugbo, daghan sab sa mga turistang Koreans ang nagduha-duha sa pagsanong sa ilang mga pagdapit nga mobisita sa Sugbo.

Nunot niini si Son Byung Cheong nabalaka sa pagkunhod sa Korean tourist nga mobisita sa Sugbo sa mosunod nga mga buwan.

Matud pa niya nga ilang gipaningkamutan nga mapalambo gyud ang ilang mga negosyo sa Sugbo uban sa gatusan nila ka mga kawani nga Pilipino kinsa niining panahona daw nabalaka sab sa epekto nga moresulta na hinuon sa pagkawagtang sa ilang trabaho.

Gitataw niya nga sila nga mga nagbukas og patigayon sa Sugbo andam kanunay sa pagsunod sa mga lagda nga gilatid sa balaud sa nasud ug andam usab sila sa pagpakig-alayon sa mga awtoridad kun adunay dautang pundok gikan sa ilang nasud nga mahidangat nga ang tumong mao lang ang paghimo og mga dautan nga kalihukan. (BANAT NEWS)