‘Posthumous award’ gihatag kang Bensi

CEBU, Philippines - Gipasidunggan sa konseho sa Dakbayan sa Lapu-Lapu si Raquel Bensi, ang traffic enforcer sa City Traffic Management Systems nga gipusil patay sa wala pa mailhing mamumuno niadtong Enero 27.

Gibutyag ni acting Vice Mayor Harry Radaza nga ilang gihatagan og “posthumous award” si Bensi subay sa iyang serbisyo nga nahatag sa siyudad sulod sa 15 ka tuig isip traffic enforcer.

Ang resolusyon gipangamahanan nilang Konsehal Flaviano Hoyas Jr. ug Radaza.

Sa laing bahin, si acting Mayor Marcial Ycong nipahibawo nga iyang isugyot ang P100,000 nga reward money sa makahatag og impormasyon sa nagpusil kang Bensi.

Si Radaza nagkanayon nga maghuwat siya sa hukom ni Ycong aron ilang maestoryahan sa mga sakop sa Sangguniang Panlungsod. (Christell Fatima M. Tudtud/GMR)

Tricycles sa Mandaue tangtangan sa extension

Uyon ang mga tricycle drivers ug operators sa tinguha sa kagamhanan sa Dakbayan sa Mandaue nga tangtangan sa extension nga lingkuranan ang ilang sidecar. Si Glenn Antigua, operation chief sa Traffic Enforcement Agency of Mandaue (TEAM), nagkanayon nga maisip nga overloading ang karga sa mga tricycles nga may extension nga lingkuranan.

Pipila ka traysikol nga nagbiyahe sa Barangay Pagsabungan ug Canduman ang boluntaryo na nga gitangtangan sa extension.

Samtang gihangop nila ang gipadayag nga reaksiyon ni Mayor Gabriel Luis “Luigi” Quisumbing nga pagwagtang na sa rekisito sa ilang pagkuha og business permit. Kini human sa labing unang consultative meeting nga gipahigayon sa Canduman nga gitambongan sa mga tricycle drivers ug operators.

Matud ni Quisumbing nga prangkisa na lang ang pangitaon ug dili na ang business permit aron dili na mabug-atan ang mga operators. (BANAT NEWS)