MARINA nag-imbestigar na sa disgrasya sa Mactan Channel

CEBU, Philippines - Nangabot na gikan sa kauluhan ang mga imbestigador sa Maritime Industry Authority (MARINA) aron sa pagpahigayon og imbestigasyon sa panagbangga sa M/V St. Braqueil ug SMC Barge 8 sa Mactan Channel niadtong Sabado sa gabii.

Sumala pa ni Atty. Andrew Dadola, legal officer sa MARINA-7, nga ilaha na karon gi-consolidate ang tanang dokumento nga gikinahanglan sa imbestigasyon.

Gawas sa pagsuspenso sa duha ka barko ug sa tugboat nga nagguyod sa barge, apil sab nga gipasuspenso ang lisensiya sa mga tripulante ug kapitan niini.

Matud ni Dadola nga kasong administratiba ang isang-at batok sa duha ka shipping companies.

Gitug-an sab ni Cebu Coast Guard Station commander Dionelitt Ampil nga nakadawat na sila og go-signal gikan sa district commander sa Coast Guard sa pag-umol og fact-finding committee alang sa himoon nga Marine Casualty Investigation.

Kini langkuban sa 10 ka sakop diin apil na niini ang representante gikan sa MARINA-7.

Dugang ni Ampil nga ang resulta sa ilang imbestigasyon ihatag ngadto sa MARINA kinsa maoy mopahamtang og silot sa kompaniya.

Base sa Marine Protest sa fastcraft, kini nangatarungan nga walay suga ang barge hinungdan nga wala kini nabantayi ug sila nabangga sa luyo nga bahin.

Samtang sa Marine Protest sa barge nagkanayon ang kapitan niini nga nahibulong na lang sila nga gi-radyohan sila sa fastcraft sa dihang nibangga na kini.

Si Ampil nitug-an nga ila pa nga susihon kun kinsay nagsulti sa tinuod sa duha ka habig diin apil nga ilang susihon kun nilapas ba sa allowable speed ang MV St. Braquiel sa Mactan Channel ug kun anaa pa sa husto nga position ang barge alang sa rota sa mga inbound nga barko. (BANAT NEWS)