Tommy: Coal plant patay na

CEBU, Philippines - Gihulagway nga patay na ang isyu sa pagtukod og 300-megawatt nga coal-fired power plant sa Barangay Sawang Calero human nibutyag si Cebu City Mayor Tomas Osmeña nga dili niya suportahan ang maong proyekto.

Matud sa mayor nga inisyal niyang plano nga mosugot ra siya sa 30-megawatt apan iyang suportahan ang mga tawo niya sa Bando Osmeña Pundok Kauswagan nga sila si kanhi konsehal Nida Cabrera ug Alvin Dizon kinsa supak sa proyekto.

Matud ni Osmeña nga sobra ra ka dako ang 300-megawatt nga ibutang sa daghang nagpuyo nga residente.

Kagahapon nag-rally ang gatusan ka residente sa Barangay Sawang Calero, Pasil, Suba, San Nicolas Proper ug Pahina San Nicolas atubangan sa planta sa Ludo aron ipaabot ang suporta sa proyekto.

Si Jesiebel Panuela, 30, sa Sawang Calero, niingon nga mosuporta siya sa proyekto tungod kay makahatag kini og trabaho sa iyang pamilya. 

“Gipasaligan pud mi sa taga Ludo nga dunay libreng pasuga, dili pud kutihon sa requirements kun mang-apply ug mahatagan gyud og panginabuhi akong bana ug puhon akong mga anak,” matud niya.

Kagahapon nagpahigayon sab og consultative meeting si Konsehal Joel Garganera kinsa pangulo sa committee on environment sa konseho sa siyudad.

Gitambongan kini sa mga representante sa Energy Regulatory Commission, Department of Health, Department of Environment and Natural Resources ug Department on Energy.

Sigun ni Garganera nga niingon ang DOE nga angayan magbutang og dugang planta sa enerhiya tungod sa nagkataas nga demand.

Matud niya nga kinahanglan sab paminawon ang tanang habig sa mga apektadong ahensiya ug katawhan sa maong proposal.

Una na nga gibasura sa konseho ang maong plano sa Ludo. (BANAT NEWS)