Trucking, container yards sa NRA ibalhin

CEBU, Philippines - Hingpit nga giaprobahan sa konseho sa Dakbayan sa Mandaue nga gipangulohan ni Bise Mayor Carlo Fortuna ang unom ka buwan nga moratorium sa pagpatuman sa City’s Comprehensive Land Use Plan.

Kini human nihangyo si Mayor Gabriel Luis Quisumbing pinaagi sa gipadala niining suwat ngadto kang Fortuna.

Naglakip sa mahatagan og moratorium mao ang mga patigayon sama sa trucking services operation, logistics and container yards nga nahimutang sa Barangay Tipolo ug Subangdaku nga gi-classify isip Mandaue City’s Special  Economic Administrative Zone nga maoy nalakip sa CLUP nga gipatuman sa kagamhanan sa dakbayan.

Ang paghatag og unom ka buwan nga moratorium maoy paghatag og kahigayonan sa mga establisemento nga apektado sa ilang pagbalhin og lugar.

Nasayran nga sagad sa mga nagpadagan sa maong matang sa patigayon ang anaa nahimutang sa North Reclamation Area nga sakop sa Barangay Tipolo ug Subangdaku.

Nag-unang hinungdan sa paghimo sa maong lakang sa kagamhanan mao ang paghatag og kahapsay sa dagan sa mga sakyanan. - /GMR) (BANAT NEWS)