Fishing ban sa Visayan Sea humana

CEBU, Philippines - Napupos na ang tulo ka buwan nga fishing ban sa Visayan Sea sa niaging semana.

Matud sa pangulo sa Bureau of Fisheries and Aquatic Resources-7, Dr. Allan Poquita, nga makapaabot ang mga mananagat og abunda nga kuha sa mosunod nga mga buwan.

Ang fishing ban gisugdan niadtong Nobiyembre 15 hangtud sa Pebrero 15 aron paghatag og higayon sa mga tamban ug ubang isda nga makapamiso.

Atol sa close season, ang mga law enforcers nihimo og pagpatrolya  aron mabantayan ang kadagatan.

Dili mominus sa tulo ka commercial fishing vessels ang nadakpan sa composite team gikan sa ahensya, sa kapolisan ug sa coast guard samtang gipasakaan na usab og kasong kriminal ang mga operators niini.

Si Poquita nipasabot nga ang mga nadakpan nakalapas sa Fisheries Administrative Order 167-3 nga nagdili sa pagpanguha sa sardines, herrings ug mackerels sa Visayan  Sea.

Ang nakalapas posibleng mapriso sulod sa unom ka buwan o unom ka tuig ug mamultahan og P6,000. Posible pud kining mahimong igong rason aron makanselar ang fishing permit o lisensiya sa operator.

Ang tinuig nga close season na-establisar pinaagi sa maong FAO diin mohatag og igong panahon sa tulo ka pelagic coastal fishes nga mangitlog ug moabot sa kahamtong aron sa pagpadaghan sa populasyon niini.

Ang sardines, herring ug mackerels ang tulo sa mga grupo sa isda sa Visayan Sea nga mao ang usa sa mga abunda kaayo nga pangisdaan sa nasud.

Kini gilibotan sa Probinsiya sa Sugbo, Masbate, Negros Oriental ug Negros Occidental.

Si Poquita nipahibawo nga ang fish production sa Sugbo mosaka sa buwan sa Marso hangtud Mayo tungod sa close season. - /GMR) (BANAT NEWS)