Fastcraft ug barge nagbangga, 58 angol

CEBU, Philippines - Gipasumitir sa ilang tagsa-tagsa ka marine protests sulod sa 24 oras sa buhatan sa Philippine Coast Guard Cebu ang mga kapitan sa nagbanggang barko nga nahitabo sa Mactan Channel niadtong Sabado sa gabii.

Gipahibawo ni PCG Cebu Commander Dionlett Ampil nga ilang gitakda niining semanaha ang panagtagbo sa mga kapitan sa St. Braquiel nga gipanag-iya sa 2GO Shipping ug SMC Barge 8 nga gipanag-iya usab sa San Miguel Corporation.

Tumong niini mao ang pagsuta sa nahitabong panagbangga sa fastcraft ug barge nga nakaangol og 58 ka pasahero diin upat niini ang nagrabehan.

Ang mga nangaangol kabahin sa 90 ka pasahero nga sakay sa fastcraft gikan sa Ormoc.

Nasayran nga alas 10:15 sa gabii niadtong Sabado nadawat ang alarma sa coast guard gikan sa usa ka Joan Campana.

Matud ni Deputy Station Commander John Manuel Alip nga nakig-alayon dayon sila sa aduana sa Mandaue aron susihon ang taho.

Ang mga naangol gitabang sa nagkadaiyang rescue team sa Metro Cebu nga gipangulohan ni Cebu City Disaster Risk Reduction and Management Office Chief Nagiel Bañacia.

Sumala sab ni Alip nga basi sa ilang imbestigasyon, gikan sa Estancia sa Iloilo ang barge nga adunay kargang binotelyang ilimnon.

Pinaagi unya sa isumiter nga marine protests, masugdan na sa Maritime Casualty Investigation Team ang imbestigasyon. Kun molapas sa gitagal nila ang duha ka habig sa pagduso sa marine protest aduna sila’y atubangon nga violations. - /DILT) (BANAT NEWS)