Mahuyang, uyab gidunggab sa hubog
CEBU, Philippines - Nabun-og ug nakaangkon og samad dinunggaban ang usa ka mahuyang ingon man ang iyang hinigugma dihang nag-wild ang ilang silingan sa Sitio Kimba Duruhan Drive, San Roque, Dakbayan sa Talisay niadtong Biyernes sa gabii.
Ang biktima giila sa kapolisan nga si Axel De Vera, 30-anyos ug iyang hinigugma nga si Ricky Tan, 31.
Ang suspek mao si Alberto Taghoy, 45, nagpuyo sa nahisgutang lugar.
Si SPO2 Yvonne Ilustrisimo sa Talisay City Police Station nibutyag nga nagtan-aw og telebisyon ang mga biktima dihang gisikaran sa suspek ang bongbong hinungdan sa pagkabuslot niini.
Nakasulod ang suspek sa ilang lawak dayon sumbag makaduha ka higayon ngadto ni De Vera. Wala pa kini natagbaw, gidunggab pa kini sa luyong bahin sa iyang lawas.
Samtang gidunggab sab sa suspek nga hubog ang hinigugma sa mahuyang nga naigo sa iyang bukton.
Naglumba og panagan ang duha ka biktima palayo sa suspek.
Nag-abang ang mga biktima sa suspek apan giingong wala pa kini nahuman ang ilang obligasyon sa pagbayad. Hinoon nasikop ang suspek sa hot pursuit operation sa kapolisan. (BANAT NEWS)
- Latest
