Nasubo sa gidangatan sa bata
CEBU, Philippines - Gisaulog kagahapon sa Archdiocesan Shrine of Our Lady of Lourdes sa Brgy. Punta Princesa, Cebu City ang ika-60th Annual Fiesta Celebration diin gipangulohan ni Cebu Archbishop Jose Palma ang Pontifical Mass.
Sa wala pa ang misa, gideklarar una ang Special Year of Grace sugod February 11, 2017 ngadto sa February 4, 2018 ni Episcopal Vicar sa District II sa Archdiocese of Cebu, Rev. Fr. Antonio Medida.
Basi sa deklarasyon, kadtong mga layko nga mopahigayon og pilgrimage sa maong mga adlaw ug petsa, makadawat og “plenary of indulgence” kun anaa sila sa estado sa grasya diin nakahimo na sila sa pagpangumpisal ug mag-ampo sila alang sa intention sa Santo Papa.
Sa wali sa arsobispo, kini nibutyag nga ang mga pagbasa sa Santos nga Misa nagpahinumdum sa kinabuhi ug gugma sa Dios, diin sa panagway ni Hesus makita ang nawong sa kaluoy. Gitug-an niini nga daghan og titulo ang Mahal nga Birhen Maria kay daghang paagi nga gipakita niini nga puno sa grasya ug gugma.
Dugang pa niya nga kun kita makanunayon sa pag-ampo, daku kaayo ang panaghiusa sa komunidad.
Sa interbyu, gikasubo ni Palma ang gidangatan sa 4 ka bulan nga bata nga giamung-amungan sa Dakbayan sa Carcar.
Nanghinaut kini sa dinalian nga hustisya alang sa maong bata. (BANAT NEWS)
- Latest
