Mama naangol kay gitigbas sa anak
CEBU, Philippines - Usa ka 71-anyos nga inahan giunay pagtigbas sa iyang anak nga giingong may problema sa pangisip didto sa Barangay Poblacion, Compostela kaniadtong Biyernes sa hapon.
Si PO3 Emil Robilla sa Compostela Police Station miingon nga si Carmen Sampan nakaangkon og mga tinigbasan sa lainlaing parte sa iyang lawas, apan gideklarar nga luwas na hinoon sa kakuyaw.
Matud ni PO3 Robilla nga ang 33-anyos nga anak sa biktima nga si Joel maoy miunay pagtigbas sa iyang mama, sa wala’y igong hinungdan, apan ang iyang pamilya wala’y plano nga mopasaka kaniya og kaso.
Si PO3 Robilla nagkanayon nga giasoyan sila sa pamilya sa biktima nga mura’g kalit lang nisugmat ang sakit ni Joel ug mikuha kini’g sundang ug gipanigbas ang iyang inahan.
Suwerte kay usa sa iyang mga igsuon ang abtik kaayo nga miresponde ug nailog ang sundang gikan kang Joel ug wala gyud niya mapatay ang iyang mama.
Si Joel abtik kaayo nga misibat, apan nadakpan gihapon kini sa kapolisan ug mga tanod sa gihimong follow-up operation. Ang samaron nga inahan gidala sa Vicente Sotto Memorial Medical Center.
Usa ka igsuon ni Joel nga si Ramil Sampan miadto sa Compostela Police Station ug miingon nga wala sila’y plano pagpasaka og kaso batok sa suspek, ug gani tinguha nila nga masulod kini sa mental hospital. (BANAT NEWS)
- Latest
