P20 mil ihatag sa taga Duljo-Fatima

CEBU, Philippines - Mahatagan og tag P20 mil nga financial assistance gikan sa kagamhanan sa Siyudad sa Sugbo ang 71 ka pamilya nga boluntaryong moguba sa ilang panimalay.

Gipahibawo ni Genevieve Alcoseba, pangulo sa Division for the Welfare of the Urban Poor (DWUP) nga kun kaniadto, nasabutan nga hatagan og subsidy rental ang 71 ka pamilya nga maapektuhan sa pagpalapad sa karsada sa Barangay Duljo-Fatima, karon subay sa kamanduan ni Mayor Tomas Osmeña, hatagan na sila og tag P20 mil financial assistance.

Apan aron makadawat sa P20 mil, kinahanglan nga ang tag-iya mismo sa istraktura maoy moguba niini. Wala pay timeline ang DWUP apan ilang paningkamutan nga mapadali kini.

Nunot niini, subling nanawagan si Alcoseba sa mga residente sa Duljo-Fatima nga naapektuhan sa sunog nga kun dili gyud kapugngan nga motukod og temporary shelter, hangyo niya nga light materials lang una ang gamiton ug dili konkreto aron dili mausik ang kwarta nga ilang gipamalit sa materyales.

Nasayran nga dili lang 71 ka pamilya ang boluntaryong moguba sa ilang panimalay apan lakip na usab ang mga biktima sa sunog.

 Alang niadtong mga walay kapasidad nga boluntaryong moguba sa ilang panimalay si Alcoseba miingon nga makig-alayon sila sa PROBE aron ang maong buhatan maoy mohimo niini.

 Gipahibawo sab ni Alcoseba nga nag-reblocking na sila sa Duljo-Fatima ilabi na sa Cabenum Road.  (BANAT NEWS)