7 ka balay apektado sa sunog sa Kamputhaw
Nadawat sa kabomberohan ang alarma sa sunog, alas 10:50 sa gabii ug nakontrolar alas 11:16 sa gabii.
Nagsugod ang kayo sa ikaduhang andana sa panimalay ni Vincent Ricardo nga giokupahan ni Evelyn Juatan.
Matud ni SFO1 Geofrey Solon, Fire and Arson Investigator, nga giimbestigar pa nila ang maong kaso. Ilang gituohan nga kandila nga wala mapawong maoy hinungdan sa sunog. Nasayran nga walay linya sa kuryente ang maong panimalay.
Sumala pa ni Solon, 6 ang hingpit nga naugdaw ug 1 ang partially damaged.
Ilang giisa ngadto sa second alarm ang sunog nga adunay danyos nga usa ka gatos ka libo ka pesos ug walay natala nga naangol o nakalas sa insidente.
Ang pangulo sa Cebu City Disaster Risk Reduction and Management office Nagiel Banacia nibutyag nga ang Quick Response Team nipabarog og temporaryong evacuation center sa may Santa Cruz Chapel, dili ra layo sa lugar nga nasunugan.
Nagpahigayon usab og survey ang Department of Social Welfare and Services alang sa mga apektadong pamilya. (BANAT NEWS)
- Latest
