Illegal swertres gibantayan sa Casuntingan police

CEBU, Philippines -  Gihingusgan sa Presinto 4 sa Mandaue City Police Office (MCPO) nga nagbase sa Barangay Casuntingan ang ilang kampanya sa pagsumpo sa ilegal nga kalihukan dili lang ang pagpayuhot sa ginadiling drugas kay lakip na ang ilegal nga sugal nga swertres. Gipahibawo ni PO3 Richard Cabillo sa Presinto 4 nga ang mao nilang kampanya, nunot sa pagkasikop sa usa ka tawong usher sa swertres sa Sitio Pilit, Brgy. Cabancalan.

Matud sa polis nga ang suspetsado nga si Jonathan Bello, 25 anyos, taga Canduman Housing ilang nasikop dihang sila nagpatrolya sa lugar human ilang nasigpatan nga nangisyo kini og numero sa ilegal nga swertres.

Dugang ni PO3 Cabillo nga nunot sa pagkasikop ni Bello, nasakmitan kini og usa ka stub nga napuno sa kombinasyon sa mga numero, salapi nga gipusta sa iyang mga kustomer nga kasagaran mga traysikol drayber ug mga habal-habal drayber. Gibutyag ni Cabillo nga tinguha nila ang pagsuhid sa nagkadaiyang hilit nga lugar ubos sa ilang area of responsibility aron sikopon ang mga nalambigit sa maong matang nga sugal. (BANAT NEWS)