Manakop sa ‘jaywalkers’ di mag-uniporme

CEBU, Philippines - Plano karon sa kadagkuan sa Traffic Enforcement Agency of Mandaue (TEAM) ang pagsagol sa magsibilyan nga mga traffic personnel sa mga tawo nga molabang sa dalan nga maoy motan-aw sa makalapas sa anti-jaywalking ordinance.

Si Glenn Antigua, operations chief sa TEAM, niingon nga panahon na gyud ang paghatag og disiplina alang sa makahimo og kalapasan sa lagda sa trapiko sa dakbayan.

Matud niya nga magsibilyan lang ang mga traffic personnel apan iyang giklaro nga magtangkil kini sa ilang TEAM ID cards sa mga higayon nga mohimo sila og pagpatrolya sa mga dalan nga ilang gidestinuhan.

Butangan og mga traffic personnel ang mga dalan nga daghan ang mga tawo nga manglabang sa buntag ug sa hapon.

Naglakip sa mga dalan mao ang sa Barangay Centro diin magdasok ang manglabang sanglit nag-atbang dinhi ang City Hall, National Shrine of Saint Joseph,  Saint Joseph Academy, mga malls ug merkado publiko.

Dugang ni Antigua nga base sa ilang natala nga mga nadakpan sukad sa unang adlaw nilang pagpatuman sa ordinansa, niabot na sa 1,200 ka tawo ang nadakpan lakip na sa mga drayber.

Gitataw niya nga nagpadayon usab ang ilang pagpahinumdum sa mga pedestrians sa mga lagda nga gipatuman sa kagamhanan sa pagseguro nga mahimong hapsay ang kahimtang sa kadalanan. (BANAT NEWS)