2 ka detachment sa North Cotabato gisulong sa BIFF

CEBU, Philippines - Giatake sa mga bandido ang duha ka detachment sa managlahing insidente sa duha ka lungsod sa North Cotabato niadtong Sabado sa gabii ug pagkakadlawon niadtong Domingo.

Sa taho sa philstar.com, si PSupt. Romeo Galgo, Jr., ang tigpamaba sa Regional Police Office-12, nibutyag nga ang Bangsamoro Islamic Freedom Fighters (BIFF) maoy niatake sa detachment sa Barangay Nalapaan sa Lungsod sa Pikit, North Cotabato alas 4 sa kadlawon niadtong Domingo hinungdan sa nahitabong pinusilay tali sa duha ka grupo.

Matud sa kapolisan sa lugar nga ang mga military sa detachment nisukol hinungdan nga wala na makaduol ang mga sakop sa BIFF.

Giingong upat ka sakop sa bandidong BIFF ang gikatahong samaran atol sa nahitabong pinusilay.

Ang maong insidente nakamugna og pag-panic sa mga Muslim ug Kristiyano nga nanimuyo sa nahisgutang lugar.

Nasayran nga sa wala pa kini nahitabo, girakrakan sab diay ang laing detachment sa may Barangay Pagangan sa Lungsod sa Aleosan sa mao gihapong grupo.

Matud sa mga lokal nga opisyal sa lugar nga ang mga sakop sa BIFF niduol sa detachment nga gibantayan sa mga sundalo ug lokal nga sakop sa Citizens Armed Forces Geographical Unit, diin gawas sa pagpangrakrak gikan sa duha ka direksyon, nagpabuto sab kini’g granada.

Bisan og kuwang sa tawo ang tropa nga anaa sa detachment, nakabawos kini hinungdan nga namalik sa agi ang ilang mga kontra.

Ang kapolisan sa Aleosan miingon nga gikumpirmar sa mga taga barangay nga ang maong mga armado, sakop sa BIFF nga nibuwag sa Moro Islamic Liberation Front niadtong tuig 2010, kinsa giingong nanghambog nga sila ninunot sa kawsa sa Independent State of Iraq and Syria ug nigamit sa itom nga ISIS flag isip ilang revolutionary banner. (BANAT NEWS)