Salisi gang gibantayan sa kapolisan

CEBU, Philippines - Higpit nga gibantayan ang grupo sa mga tawo nga gituohang sakop sa Salisi Gang nga naglihok karon sa Metro Cebu human kini nakabiktima na sab og mga langyaw nga turista nga naglakip sa usa ka Chinese national nga negosyante.

Asoy ni PO2 Jayson Flores sa Presinto 1 sa Mandaue City Police Office nga sa ilang follow-up nga gihimo, ilang nasuta nga nagmabinantayon usab ang maong grupo sa mga lalaki nga dili makuhaan ang ilang dagway sa CCTV cameras kay sa video footage nga ilang nakuha, dili man matataw ang mga panagway niini.

Gibutyag ni PO2 Flores nga ang biktimang Chinese national nga si Chi Chen, 61 anyos, gikan sa Waterfront Hotel sa Dakbayan sa Lapu-Lapu ug mihapit lang sa Oyster Bays Restaurant sa may dalan Plaridel sa Brgy. Alang-Alang sa maong dakbayan aron manihapon.

Dugang sa polis nga sa pagsulod sa biktima sa maong kan-anan, ilang nakita sa video footage nga nagsunod sab ang wala hiilhing lalaki nga nagtakilid nga maoy hinungdan nga dili gyud mailhan ang panagway niini.

Nakuhaan sab sa CCTV pagkuha sa bag sa biktima nga gipatong sa bakanteng lingkuranan nga adunay sulod nga salapi nga mokabat og kapin sa tunga sa milyon ka pesos.

Matud ni Flores nga nakig-alayon na sila karon sa Lapu-Lapu City Police Office tungod usab sa mga taho nga ang maong grupo, nakabiktima na usab og mga langyaw nga turista sa nahisgutang lugar. (BANAT NEWS)