Stability sa yuta sa Barangay Busay sutaon

CEBU, Philippines - Susihon ni Konsehal Jerry Guardo, kinsa maoy chairman sa Committee on Infrastructure and Urban Planning ang Brgy Busay uban sa Mines and Geosciences Bureau (MGB)-7, City Engineering Office, Office of the Building Officials (OBO) ug Department of Public Works and Highways (DPWH)-7 aron pagsusi sa stability sa yuta sa maong barangay.

Sigon ni Konsehal Guardo nga sa iyang pagpauli paingon sa siyudad gikan sa Brgy Adlaon, iyang naagian ang resort sa Brgy Busay diin iyang nakita nga hinay-hinay na nga nahulpa ang yuta sa ilang parking area hinungdan sa iyang kabalaka.

Gumikan niini, giawhag ni Guardo ang mga nahisgutang buhatan nga susihon ang stability sa yuta sa maong lugar.

Gawas sa resort, gusto sab masayran ni Guardo kun ang yuta makasugakod sa gibug-aton sa mga istraktura dili lang sa resort lakip na ang iladong temple sa maong dapit.

Ipatan-aw sa konsehal kun ang desenyo sa riprap wall sa lugar nasubay sa standard sa siyudad, kun duna ba kini fencing permit ug buot niya nga tutukan sa DPWH ang paghimo og retaining wall sa mga dapit nga nahitaboan sa landslide.

Dunay plano si Guardo nga hangyuon ang kadagkuan sa resort ug temple nga kun mahimo, dili una pabisitahan og turista ang dapit hangtod nga mahuman ang inspeksiyon kay alang kini sa kaluwasan sa tanan.

Sunod semana mopatawag og executive session si Guardo aron mahibawo ug madungog usab ang opinion sa mga kaubanan niini sa konseho mahitungod sa maong hitabo.

Imbitahon sab niya ang MGB-7, DPWH, OBO ug City Engineering Office aron makapasabot sila sa sitwasyon. (BANAT NEWS)