Pundasyon sa Mananga Bridge lig-on pa

CEBU, Philippines - Lig-on pa ang pundasyon sa taytayan sa Mananga bisan paman og giigo kini sa kusog nga bul-og sa tubig niadtong miaging semana human mibubo ang kusog nga uwan.

Gitug-an ni Engr. Leslie Anthony Molina sa Department of Public Works and Highways (DPWH) 2nd Engineering nga bisan paman og adunay mga nangaguba panahon sa kusog sa sulog sa tubig sa sapa, apan pabilin gihapon nga lig-on ang pundasyon sa taytayan sa Mananga.

Hinuon iyang giangkon nga aduna lang sila’y pagabuhaton unya nga ginagmay nga pag-ayo sa pipila ka bahin nga gikankan sa tubig sapa.

Gani ila namang giduso ang ilang mga proposal ngadto sa ilang buhatan alang sa pipila ka mga trabahuonon sa taytayan sa Mananga 1, 2 ug 3.

Iyang giklaro nga dili angay mabalaka ang katawhan kay siento porsiyento pa nga lig-on ang taytayan sa Mananga.

Sa nasayran, si Engr. Molina uban ni Mayor Eddie Gullas, niinspeksyon sa mga taytayan niadtong miaging semana.

Lakip nilang gitan-aw mao ang laraw ni Mayor Gullas nga iyang palawman ug ipatul-id ang agianan sa tubig gikan sa bukid hangtud sa dagat. (BANAT NEWS)