Jaywalking ipatuman na sa Mandaue

CEBU, Philippines -  Ipatuman na sa TEAM (Traffic Enforcement Agency of Mandaue) ang Anti-Jaywalking Ordinance sunod buwan human makita nga mao kini ang solusyon aron mamenusan ang trapik sa dakbayan sa Mandaue.

Si Glenn Antigua ang pangulo sa TEAM mibutyag nga sugod karong adlawa hangtud sa katapusan sa buwan mao ang pagpanghatag og impormasyon sa mga katawhan kabahin sa maong balaod.

Nakita sa TEAM nga ang usa sa hinungdan sa trapik sa siyudad mao ang pagpataka og labang sa mga tawo, pagpataka og para sa mga PUJ hinungdan nga ang mga PUJ mohunong kun asa ang mga pasahero nag-atang.

Dugang ni Antigua nga sa pagkakaron dili pa dakpon ang mga magpataka og labang, hatagan una sila og abiso sa mga enforcer aron mapahibawo ang hingpit nga pag-implementar na unya sa anti-jaywalking ordinance sa Mandaue.

Sa mga mobisita sa maong dakbayan, hatagan sab og abiso, dayon hatagan og impormasyon sa maong balaod.

Magsugod ang pagpanakop sa mga magpataka og labang sunod buwan diin pabayron og multa nga P50 ang madakpan ug ang dili mobayad adunay upat ka oras nga community service. Ang multa nga makolekta, mapunta sa panudlanan sa TEAM.

Dugangan og 50 ka sakop ang TEAM aron masiguro nga mabantayan ang mga magpataka og labang, wala pa kini labot sa ilang gi-deputize nga mga barangay tanod aron motabang sa pagdakop sa mga badlungon nga dili motuman sa maong balaod.

 “It’s our time to take our own responsibility, dili ra man ni para namo, para ni sa tanan aron malikayan ang trapik sa Mandaue”, matud pa ni Antigua. Lendilyn Alquilos (BANAT NEWS)