P1.9M ang danyos sa mga pananom

CEBU, Philippines -  Minilyon na ang danyos nunot sa nasinating pag-uwan sa miaging mga adlaw ngadto sa mga mag-uuma sa bukirang barangay sa siyudad sa Sugbo

Gipahibalo ni Cebu City Agriculture Assistant Head Arlie Gesta nga base sa ilang assessment, miabot sa P1.9 milyones ang danyos sa mga pananom diin napulo ka bukirang barangay ang apektado. Kini gilangkuban sa Sinsin, Sudlon 1 ug 2, Paril, Malubog, Mabini, Lusaran, Guba, Cambinucot ug Binaliw diin 128 ka mag-uuma ang naapektuhan.

Wala una nila gilabot ang danyos sa Brgy. Sirao kay daku kaayo kinig naangkon nga kadaot ug nagpadayon pa ang ilang gihimong assessment sa dapit.

Kay apektado man ang mga pananom, posibleng adunay pagtaas sa presyo sa mga lagutmon. Gani base sa monitoring sa maong departamento kun itandi sa miaging buwan, ang presyo sa mga utanon karon misaka og 50 porsiyento.

 Ang mga utanon nga apektado naglangkub sa lettuce, Chinese Cabbage, talong, kamatis, pepper ug luy-a.  Mihatag na hinoon og tabang ang siyudad sa mga apektadong mag-uuma sama sa fertilizers ug pananom nga ihulip sa mga nangadaot.

 Gawas sa mga pananom, nasuta usab nga apektado ang kahayupan sa mga bukirang barangay sa Tagba-o, Tabunan, Babag ug Lusaran diin muabot sa unom ka kanding ug duha ka baka ang namatay.

 Awhag ni Gesta kanila nga kun dautan ang panahon, dili gyud angay pasagdan ang mga binuhing hayupan aron dili mangamatay.

 Samtang si Mayor Tomas Osmeña niingon nga andam mohimo og lakang ang siyudad sa nahitabong landslide sa Brgy Busay apan ang problema sa Sitio Garahe kun diin nahitabo ang landslide sa usa ka private property, limitado ra ang mahimo sa kagamhanan.

Hinoon nakighinabi na ang mayor sa usa sa mga tag-iya niini ug andam ang siyudad nga mogahin og pundo aron sa paghimo og mitigating measures sa dapit. Dugang ni Osmeña nga i-realign niya ang Disaster Fund aron mas mahimo kining responsive sa contingencies sama sa pagtukod og refugee centers.

 Mipadayag usab kini nga dili siya uyon nga temporaryong pasirad-an ang nailang Sirao Flower Farm kay alang niya dili delikado ang maong lugar ug ang maong flower farm daku og natabang sa pag-promote sa mga bukirang barangay. Decemay P. Padilla (BANAT NEWS)