Duha ka ginang sa Talisay biktima sa budol

CEBU, Philippines - Duha ka ginang sa Dakbayan sa Talisay ang nidangop sa kapolisan human nabiktima sa budol-budol gang ug dili mominos sa P50 mil ug mga alahas ang nasakmit niadtong Miyerkules sa gabii.

Unang nidangop sa Talisay City Police Station mao si Abdulia Borlasa, 39, taga Pungsod, Barangay Lawaan 3.

Matud ni Borlasa nga gikan siya sa simbahan ug nisulod sa merkado kay nipalit og sud-an apan sa iyang paggawas adunay babaye nga niduol kaniya.

Nagpaila kini nga inahan sa classmate sa iyang anak ug gikan kini sa Norway ug mohatag og pinaskuhan kaniya hinungdan nga nagkuyog sila sakay sa usa ka sakyanan nga adunay mga lalaki.

Sumala pa ni Borlasa nga niadto sila sa usa ka fast food chain sa Tabunok ug dihang naglingkod na sila, gipasulod sa babaye ang iyang pitaka sa bag niini dayon nilakaw.

Sulod sa pitaka ang P8 mil ug singsing nga karaan. Si Borlasa igo na lang sa pagtaho sa kapolisan.

Ikaduhang biktima nga nitaho alas 9:55 sa gabii mao si Adelina Gier, 62, taga Barangay Cansojong sa maong dakbayan.

Sumala pa ni Gier nga dunay babaye nga niduol kaniya kay inahan kini sa amiga sa iyang anak ug ihatud siya pagpauli sa ilang balay sakay sa sakyanan.

Giingong gipugos siya pagpasakay ug sa dihang nakasakay na siya didto gikuha ang iyang pitaka ug gipahubo ang iyang tanang alahas.

Gitug-an ni Gier nga P45 mil nga iyang kwarta ang nakuha, duha ka alahas ug ATM card dayon gipakanaug siya sa Tabunok human nakuha ang iyang mga kabtangan.

Ang kapulisan sa Talisay padayong nisubay sa grupo nga nibiktima sa mga babaye. – BANAT NEWS