71 ka balay apektado sa himoong dalan sa Duljo

CEBU, Philippines - Sugdan sunod semana sa kagamhanan sa Siyudad sa Sugbo ang clearing operation sa Barangay Duljo-Fatima nga giplanuhan nga himuan og lapad nga dalan human kini naigo sa dakung sunog.

Subling gibisita sa Division for the Welfare of Urban Poor (DWUP) niadtong miaging adlaw ang mga residente nga maapektuhan sa himoon nga dalan sa nahisgutang barangay.

Sa kinatibuk-an, 71 ka panimalay ang apektado sa clearing operation. Hinoon dili pasagdan sa siyudad ang mga namuyo niini kay aduna may tabang nga ihatag ang Cebu City Government.

 Ang pangulo sa DWUP nga si Genevieve Alcoseba miingon nga angay na nga sugdan ang plano sa siyudad sa Brgy. Duljo-Fatima ug kun aprubahan ni Mayor Tomas Osmeña ang proposal nga mohatag og subsidy rental, ang mga maapektuhan makadawat og P12 mil alang sa tulo ka buwan.

Ang P12 mil bahinon sa tulo ka buwan diin tag P4 mil matag buwan nga maoy ibayad nila kun makakita na sila og kaabangan aron mahimo nilang temporaryong pinuy-anan samtang naghimo sa proyekto sa ilang barangay.

Gitataw ni Alcoseba nga dili gyud nila mapugngan kun ang mga residente nga apektado sa sunog motukod og balik sa ilang panimay ilabi na nga nagsige og uwan.

 Apan hangyo nila nga kun motukod man gani, dili lang konkreto ang balay ug light materials lang una ang gamiton aron dili mausik ang kwarta nga ilang gigasto sa pagpatukod.

Ang clearing operation himoon aron adunay lapad nga dalan ang maong barangay.

 Nasayran nga ang 71 ka panimalay nga apektado sa himoong karsada, dili na mahimong makatukod og balik sa dapit apan dili gihapon angay maguol ang mga hingtungdan kay lakip man sila sa hatagan og pwesto sa usbon nga approved subdivision plan sa maong barangay.

 “Ang kanang Duljo man gud, public land man na siya. Ang kanang ma-affected karon, naa naman unta nay supposedly approved subdivision plan pero ato siyang i-usab para masulod to ang katong 71 nga ma-displace.

Of course we are not displacing anyone, temporary lang, mao bitaw parentahon nato sila kay right after mahimo na gyud ang final subdivision plan naa sila naka-allocate didto,” pasabot ni Alcoseba. – BANAT NEWS