Guwardiya gisabaan, janitor gipusil
CEBU, Philippines - Gipusil sa iyang silingan ang usa ka janitor sa Cebu City Medical Center samtang kini nagbarug gawas sa ilang panimaye alas 5:30 sa hapon sa niaging adlaw sa Mambaling, Dakbayan sa Sugbo.
Ang biktima mao si Oliver Ongcoy, 30, minyo, taga Lawis, Alaska, Mambaling, samtang ang suspek giila nga si Mario Acedera, 47, usa ka guwardiya nga nadestino sa South Road Properties.
Nalandig sa CCMC si Ongcoy human nilapos ang bala sa iyang dughan ug luwas na sa delikadong kahimtang.
Matud ni Senior Police Officer 2 Rommel Bancog, imbestigador sa homicide section sa Cebu City Police Office, pirme magkalalis ang duha gumikan sa kusog nga pagpatukar sa biktima samtang dili makatulog ang suspek.
Nagduda si Bancog nga lagmit napuno na sa kalagot ang suspek hangtud nga kini nakahimo sa krimen.
Sa follow-up operation sa kapolisan nasikop ang suspek apan wala na nakuha ang armas nga gigamit sa pagpamusil.
Kasamtangang gitanggong sa selda sa CCPO ang dinakpan nga pasakaan og kasong frustrated murder. - Jomari Fernandez (BANAT NEWS)
- Latest
