54 nasikop sa ‘Oplan Pokemon’

CEBU, Philippines - Niabot sa 54 ka tawo ang nadakpan ug kapin sa usa ka milyon ka pesos nga kantidad sa shabu ang nasakmit sa mga sakop sa Cebu City Police Office human ilang gihimo ang Oplan Pokemon ug Oplan One Time, Big Time niadtong nakalabay nga gabii sa nagkadaiyang dapit sa dakbayan.

Dungan nga nihimo og operasyon ang 11 ka police stations sa CCPO kauban ang mga sakop sa Criminal Investigation and Detection Group-7, Highway Patrol Group-7, Special Weapons and Tactics (SWAT) Team ug Cebu City Public Safety Company.

Gawas sa drugas balor og P1.3 milyones, nakuha sab sa mga polis ang usa ka .22 revolver ug usa ka .45 caliber pistol ingon man mga gambling machines.

Si Senior Supt. Joel Doria, director sa CCPO, niingon nga ang maong operasyon ilang gihimo isip pagpatuman sa seguridad sa siyudad sa kasaulogan sa Piyesta Senyor ug Sinulog karon  ug ugma.

Matud ni Doria nga daghan sa mga nasikop ug nakuha nga drugas naggikan sa Barangay Duljo-Fatima nga maoy usa sa mga dapit nga gironda sa kapolisan.

“Part pa rin ‘to ng security preparations natin sa Sinulog which is Oplan Pokemon natin at One Time, Big Time,” matud ni Doria.

Gawas sa 54 nga nasikop, dunay mga minor de edad ang nakuha sa mga polis nga gigamit nga mga tighatud og drugas ug sila gitugyan ngadto sa Department of Social Welfare and Services.

Samtang nasikop ang 18-anyos nga lalaki human nasakpang nisuyop og ilegal nga drugas sa Magay, Tangke, Dakbayan sa Talisay niadtong Huwebes sa gabii.

Ang nasikop mao si Bryan Mabala, adunay kapuyo nga nagpuyo sa Salvador, Tangke.

Ang kapolisan pinangulohan ni Supt. Emerson Dante ang naghimo sa ilang roving patrol dihang sila gitawag sa mga residente sa lugar ug gipahibawo nga adunay grupo sa mga lalaki nga nagsuyop.

Ilang giadto ang panimaye nga gitudlo sa mga residente ug didto nagkatibulaag ang mga tawo sa lugar apan si Mabala maoy nakuptan sa mga polis ug nakuhaan og drug paraphernalia.

Laing nasikop sa mga sakop sa Philippine Drug Enforcement Agency ang tulo ka tigpahuyot og ilegal nga drugas sa buy-bust operation sa Dakbayan sa Lapu-Lapu.

Nailhan ang suspek nga si Jonathan Pejana Gipiga, 34, taga Bag-ong Silingan; Alvin Amigabli Igot, 41, ug Jonathan Bones Lucernas, 38, taga Seaweeds, pulos sakop sa Brgy  Mactan.

Nasakmit kang Gipiga ang 13 ka gagmay’ng pakete sa gidudahang shabu, tulo ka P100 nga buy-bust money ug P500 nga halin sa ilegal nga drugas.

Nasakmit kang Igot ug Lucernas ang siyam ka paketeng gidudahang shabu, tulo ka P100 buy-bust money ug nagkantidad og P740 nga shabu. Jojo C. Ugdol, Gabriel C. Bonjoc ug USJ-R Intern Lendilyn Alquilos (BANAT NEWS)