6 sikop drug operations; usa menor de edad

CEBU, Philippines - Duha ka batan-on ang gibalhug sa bilangguan human nakuhaan og ginadiling drugas sa managlahing lugar sa siyudad sa Talisay niadtong Miyerkules sa gabii.

Nakadawat og impormasyon ang mga operatiba sa mga batan-ong nalambigit sa ginadiling drugas.

Una nilang gisulod ang Sitio Hawod, sa Brgy. Bulacao mga alas 9 sa gabii ug ilang nakit-an si John Alwin Otadoy, 19 anyos nga taga New Frontier Road, Brgy. Bulacao. Nakuhaan siya og 50 ka gagmay nga pakete sa shabu.

 Laing nasikop mao ang 17 anyos nga lalaki nga nakuhaan og 5 ka gagmay’ng pakete sa shabu sa Sitio Mananga, Brgy. Tabunok.

 Ang mga ebidensya nga nakuha nitimbang og 1.2 gramos ug gibana-banang nagkantidad og P14, 160 mil.

Sa dakbayan sa Sugbo, 4 ka lalaki ang nasikop sa National Bureau of Investigation sa Brgy. Labangon niadtong Martes sa gabii.

Ang mga dinakpan mao sila si Ronald Arquillano, Christopher Tautho, Jommel Sarvida ug Charleston Lunda. Sila nadakpan sa gituohang drug den duol sa pampublikong eskwelahan sa maong barangay.

Matud ni NBI-7 director Patricio Bernales Jr. nga usa ka bulan nilang gipanid-an ang subject sa buy-bust nga si Arquillano human sila nakadawat og reklamo nga duol sa eskwelahan ang maong balay nga gituohang gihimo nga drug den.

Nakuha gikan sa mga suspek ang mga pakete sa shabu nga mobalor og P100 mil ingon man mga drug paraphernalia.

Si Arquillano kinsa usa ka welder miangkon nga namaligya siya og shabu kay dugay na siyang way trabaho.

Matud niya nga niadtong gabii nga nasikop sila sa NBI igo ra siyang  gisugo sa iyang kaila nga usa ka “Edmund”  nga mopalit  og shabu.

Siya nasayod nga ilegal ang iyang gihimo apan tungod sa kalisod siya misulod sa maong bisyo alang sa 4 niya ka anak.

Gihimakak niini nga mamaligya siya sa mga tinun-an sa maong dapit.

Ang mga dinakpan gipasakahan na og kaso sa NBI kagahapon sa Cebu City Prosecutor’s Office sa kalapasan sa Dangerous Drugs Act. (BANAT NEWS)