LTFRB nanghatag og special permit

CEBU, Philippines - Kapin na sa 30 ka sakyanan ang gihatagan og libre nga special permit sa Land Transportation Franchising and Regulatory Board nga mobiyahe atol sa Piyesta Senyor sa dili ilang rota.

Gitug-an ni Emil Membrillas, tigpamaba sa LTFRB-7, nga ilang gihatagan og special permit ang 25 ka H.R Multicab nga magbiyahe sa Lapu-Lapu ug Plaza Independencia sa tag P15 ang plitehan.

Dunay lima ka Corominas bus nga magbiyahe gikan sa N. Bacalso Avenue ug Tabunok sa tag P10 ang plite ug walo ka Ceres bus nga magtuyok-tuyok sa Park Mall ug White Gold nga adunay plite nga tag P10. Dugang ni Membrillas nga gitrabaho pa karon ang permit sa Citrasco nga 75 kabuok nga mobiyahe sa Compania Maritima padulong sa South Road Properties nga maoy temporaryo nga terminal sa mga bus gikan sa habagatan nga bahin sa Probinsya sa Sugbo.

Gitug-an ni Membrillas nga tanang gihatagan og permit kinahanglang mobiyahe lang gyud sa lugar nga gidesignar kanila ug kung molapas sila sa rota mahimo silang dakpon.

Giawhag sab sa LTFRB ang katawhan nga kung sobra ra ang plitehan, mahimo nilang itawag ang oras, diin dapit ug plate number sa sakyanan sa telepono numero 231-6221. (BANAT NEWS)