Mga ATMs apektado sa shutdown

CEBU, Philippines - Dili lang signal sa cellphone ug wi-fi nga nigamit og data ang maapektuhan kun mahinayon gyud ang plano sa kagamhanan sa siyudad sa Sugbo ug sa Philippine National Police nga i-shutdown ang cell sites atol sa Sinulog.

Kay hasta ang mga Automatic Teller Machines (ATM) sa mga bangko sa mamahimong dead spots dili usab mogana.

Matud ni Konsehal Dave Tumulak, Deputy Mayor for Police Matters nga kini maoy gipahibawo kaniya sa Cebu Bankers Associations maong iyang giawhag ang mga depositors nga mas maayo nga mag-withdraw daan og kwarta nga igong magasto karong Sinulog ug aron dili sila mahasol sa mga negosyo.

Adunay 120 ka ATM booths dinhi sa siyudad sa Sugbo nga maapektuhan kun ang mga cell sites duol niini mag-shutdown.

Gipasabot ni Tumulak, wireless connected ang mga ATM dili konektado og kable o linya nga gitawag og LAN (local area network) connection alang sa seguridad nga gipatuman sa mga bangko.

“These ATMs, wireless connected ni sila. Separate ni siya sa LAN Connection kay part sad daw na sa security sa mga bangko nga separate kadtong LAN Connection kadtong dunay wired connection, separate sad ning ATM wireless ni siya,” sigon ni Konsehal Tumulak.

Giawhag ang mga depositors nga mag-withdraw na lang gyud og kwarta aron malikayan ang kahasol.

Giingong lakip ang mga silingang siyudad sama sa Mandaue, Talisay ug Lapu-Lapu ang maapektuhan sa shutdown.

Kay matud pa ang mga technical personnel sa telecommunication companies misugyot nga i-shutdown ang tibuok Sugbo ug dili lang ang rota sa Sinulog kay ang signal gikan sa ubang lugar mosulod sa siyudad maong risgo lang gihapon.

Nasayran nga napagya na og maayo ang plano sa kagamhanan sa siyudad sa Sugbo ug sa kapulisan mahitungod sa ilang plano nga pag-shutdown sa mga cell sites ug daghang pangutana basin unya og makapangandam ang mga dautang grupo   niini.

Apan gipasabot ni Tumulak dinhi masukod ang katakos sa mga law enforcement agencies kun unsaon nila nga dili gyud makalusot ang mga maghimo og kadaot sa selebrasyon. (BANAT NEWS)