Nagplano si Bato nga mosaksi sa Sinulog Parade

CEBU, Philippines - Ang hepe sa Philippine National Police (PNP) nga si Director General Ronald “Bato” Dela Rosa gikatakda nga moanhi sa Sugbo karong Sabado ug Domingo aron musalmot sa solemn procession ug mosaksi sa Sinulog Grand Parade.

Si Senior Superintendent Rey Lyndon Lawas, deputy regional director for operations, mitug-an nga gipahibalo siya ni Police Regional Director Noli Taliño nga si Dela Rosa nagplano sa pag-anhi sa Sugbo karong Sabado o Domingo.

Matud ni Lawas nga bisan og dili pa sigurado ang pag-anhi sa Sugbo sa labaw’ng opisyal sa kapolisan, nangandam na sila sa PRO-7. Si Lawas miingon nga personal si Dela Rosa nga maniid kun giunsa sa kapolisan ang pagmentinar sa kahusay ug kalinaw atol sa duha ka dagkong kalihukan.

Gawas kang Dela Rosa, gibutyag ni Lawas nga ang kapolisan nangandam usab daan nga adunay ubang opisyal sa kagamhanan nga moanhi sa Sugbo karong Domingo.

Sumala pa ni Lawas nga ang mga “VIP’s” nga mangabot sa Sugbo hatagan gyud nila og police security nga makabantay kanila. Si Mayor Tomas Osmeña wala mangimbitar og mga opisyal sa kagamhanan, bisan sila si Presidente Duterte ug Vice President Leni Robredo. (BANAT NEWS)