Labangon daug sa Sinulog sa Barangay

CEBU, Philippines - Bisan paman sa dautang panahon nga nasinati sa siyudad sa Sugbo gumikan sa Bagyong Auring, wala kini makapugong sa kalihukan sa Sinulog sa Barangay kagahapon sa hapon.

 Ang dautang panahon wala makababag sa mga miapil sa Sinulog sa Barangay nga gisalmutan sa siyam ka nagkalain-laing barangay sa siyudad Sugbo.

Nanukad ang street dancing sa Cebu Provincial Capitol ug mipatighog ang mga mananayaw sa Fuente Osmeña Circle, paingon sa Osmeña Boulevard hangtod na sa Cebu City Sport Complex.

Bisan pa man og nag-uwan padayon sa pagkiay ang mga dancer aron ipakita ang kanindot sa ilang sayaw.

Ang mga miapil gilangkuban sa Tribu Cambihanon sa Brgy. Cambinucot, Tribu Kinaiyahan sa Brgy. Pahina San Nicolas, Tribu Kaplag Buwad Festival sa Brgy. San Nicolas Proper, Banauan Cultural Group sa Brgy. Guadalupe, Pundok Inayawan sa Brgy. Inayawan, Banay Labangon sa Brgy. Labangon, Lumad Basakanon sa Brgy. Basak San Nicolas, Pundok Sambag 1 sa Brgy. Sambag 1 ug Hugpong Kabatan-onan sa Sapangdaku sa Brgy. Sapangdaku.

Human sa street dancing gisunod dayon ang pasundayag alang sa panagtiging rituwal sa dakung entablado sa Cebu City Sports Center.

Gihugyawan og maayo sa mga manan-away mao ang Brgy. San Nicolas Proper, Banay Labangon ug Lumad Basakanon.

Wala damha sa Brgy. Labangon nga ilang malangkat ang unang ganti sa Ritual Showdown nga dunay premyo nga P350 mil ug P30 mil alang sa choreographer.

Nahimong tema sa Banay Labangon mao ang paghatag og bili sa pagpinasayloay, pamilya ug pakig-uli sa mga minahal sa kinabuhi.

Giduyugan sa mabulokon nga costumes ug props inubanan sa dungan ug nindot nga duyog ug choreography ang ilang presentasyon hinungdan nga sila midaug.

Nasayran nga adunay 96 ka dancer ug kapin sa usa ka gatus ka propsmen nga gikan sa nagkalain-laing tunghaan sama sa Don Sergio Osmeña, Labangon ug mga out-of-school youth.

Personal nga kasinatian ang gihimong inspirasyon sa choreographer sa maong grupo nga si Angelo Manapsal, diin matud niya nga wala na siya’y mga ginikanan mao nga namugna niya ang konsepto kay alang niya importante ang pamilya.

Gipildi sa Banay Labangon ang nabantog na nga grupo, ang Lumad Basakanon sa Brgy. Basak San Nicolas nga nalandig sa ikaduhang pwesto sa Ritual Showdown. Gisundan kini sa Banauan Cultural Group sa ikatulong pwesto, nakuha sab ang ika-4 sa Kaplag Buwad Festival ug ika-5 ang Hugpong sa Kabatan-onan sa Sapangdaku.

Midaug sab sa Best in Musicality ang Banay Labangon, gisundan sa Lumad Basakanon, San Nicolas Proper, Guadalupe ug Sambag 1.

Nakuha sa Lumad Basakanon ang unang pwesto sa Best in Street Dancing, ikaduha ang Banay Labangon ug ikatulo ang San Nicolas Proper. Nidaug sab ang Lumad Basakanon sa Best in Costume.

Dunay lima ka hurado ang maong kalihukan ug matod sa usa niini nga si Ronnie Mirabuena ang Chief Cultural and Arts Office sa Cultural Arts of the Philippines nga ang gikuhaan nila og basehan sa pagpili og mananaog mao nga importante ang tanang elements anaa sa usa ka sayaw.

Mitambong ug personal nga mitunol sa pahalipay si Mayor Tomas Osmeña uban ang iyang asawa nga si Konsehal Margarita Osmeña.

Mipadayag sa iyang kalipay ang mayor sa nakitang kalampusan sa Sinulog sa Barangay ug nipasalig nga ang tanang misalmot midaug man o wala makaapil sa Sinulog Grand Parade.

Subay niini si Sinulog Foundation Executive Director Ricky Ballesteros miingon nga matag performance sa mga misalmot sa Sinulog sa Kabataan sa Lalawigan ug Barangay hatagan nila og giya aron mas mapanindot pa nila ang ilang pasundayag atol unya sa Sinulog Grand Parade.

Nalipay usab si Ballesteros nga nagmalampuson ang duha ka kalihukan apan iyang giangkon nga nabalaka siya sa seguridad sa mga dancer kay basin unya og madakin-as tungod sa uwan.

Bisan og dugay pa ang Sinulog 2018, alang sa mga hurado nga mas maayo nga mobisita og balik ang mga mosalmot sa cultural resources nga naa ang Cebu kay mas angayang palambuon ang conceptualization aron dili magbalik-balik. (BANAT NEWS)