300 BEOs motabang paghipos sa basura

CEBU, Philippines - Dul-an sa 300 ka mga Barangay Environmental Officers sa Siyudad sa Sugbo ang gikatakdang motabang sa paglimpyo sa kadalanan atol sa Sinulog Grand Parade karong umaabot nga adlaw’ng Domingo.

Kini human sa obserbasyon ni DPS assistant head, John Paul Gelasque nga kinahanglang andam ang siyudad tungod kay daghan ang modagsa sa nagkadaiyang kalihokan sa Sinulog.

Base sa natala nila nga inpormasyon nga sa miaging tuig, niabot og 200 ngadto sa 300 ka toneladang basura ang nakolekta sa mga garbage collectors diha lang sa carousel route ug sa downtown area.

Si Gelasque nagkanayon nga dili niya matagna kun pila ka toneladang basura ang ilang makolekta karong umaabot nga Domingo tungod sa taho nga adunay parte sa siyudad nga gidili ang pagpahigayon og street parties.

“Wala ta kahibaw ana kay wala man kunoy street party, magdepende na unsay implementation ana sa street parties,” saysay pa niya.

Kahinumdoman nga si Nagiel Bañacia sa City’s Disaster Risk Reduction Management Office miigon nga sa mga lugar lamang nga dili apil sa rota sa parada gitugot nga adunay street parties.

Motabang usab ang mga sakop sa DPS nga dul-an 600 sa pagpalimpyo sa siyudad gikan sa Domingo sa gabii hangtod sa Lunes sa buntag.

Dugang pa ni Gelasque nga motabang usab ang Market personnel, Prevention, Restoration, Order and Beautification and Enhancement, Parks and Playground sa maong operasyon.

Mipasalig si Gelasque nga andam na ang siyudad sa pag-atubang sa basura ini’g Sinulog tungod kay adunay saktong tawo nga motabang sa paglimpyo sa lugar.

Saysay pa niya, dili sila manakop sa mga tawo nga pataka’g labay tungod kay gihandom na nila nga makalimot og tuman sa angay sa paglabay sa ilang tagsa-tagsa ka basura tungod sa ilang kalingaw nga nagtan aw sa mga kalihokan.

“Same rule ra na, pero tungod sa kanang volume sa taw ana, dili na sila makahuna-huna kay party mode na sila,” si Gelasque miingon.

Sa pagkakaron, naghan-ay pa sila kun unsay mga kuwang nga kinahanglanon nila sa paghipos sa mga basura. - Odessa Leyson (BANAT NEWS)