Kapin 300 ka sea marshals mobantay sa fluvial procession
CEBU, Philippines - Moabot og sobra 300 ka mga sea marshals ang mobantay sa fluvial procession nga kompleto sa mga medical personnel ug communicators aron sa pagsiguro nga han-ay ug luwas ang maong kalihukan pandagat subay sa kapistahan sa Senyor Santo Niño.
Si Dionilett Ampil ang Commander sa Coast Guard Cebu Station nga nahinabi sa Banat News miingon nga atol sa ilang coordination meeting kagahapon nanambong ang mga sakop sa Office of the Civil Defense, Philippine Navy, Communicator, Bureau of Fisheries and Aquatic Resources-7 ug Philippine Coast Guard Auxiliary.
Ilang gituki kung pila ka mga sea marshal ang motabang sa seguridad atol sa ipahigayon nga fluvial parade sa kadagatan. Dugang pa ni Ampil, padayon silang nagmonitor karon sa lakat sa panahon kauban ang ubang ahensya sa kagamhanan aron sa pagsiguro gilayon sa mga angay buhaton sa higayon adunay mga dili maayong lakat sa panahon nga mahitabo.
Si Lt. Reynold Roy Paas, Asst. Operation Officer sa Naval Forces Central, nibutyag nga aduna sila’y team nga maoy mopalayo sa mga baruto ug lantsa nga mopaduol sa galyon atol sa fluvial procession. Andam na usab sila alang sa pagtabang ug paghatag og seguridad alang sa ipahigayon nga fluvial diin naka heightened alert usab ang ilang ginsakopan.
Si Capt. Ralph Yap, Deputy District Director Operations sa PCG, nitug-an nga adunay mga medical personel nga magsakay sa tanang mga nakarehistrong sakayan aron maoy motubag sa higayon kung adunay mga emerhensya nga posibleng motumaw.
Aduna usab sila’y usa ka sea ambulance nga maoy mo-transport sa mga deboto nga magkinahanglan niini.
Si Joy Hernandez, sa Office of the Civil Defense, nitug-an nga andam na usab sila nga mohatag og ayuda sa tanang mga ahensya sa gobiyerno nga lumilihok atol sa adlaw sa kapistahan.
Gitug-an ni Hernandez, lakip usab nilang giandam ang mga hospital nga posibleng dad-an sa mga mahimong pasyente atol sa fluvial parade. (BANAT NEWS)
- Latest
