Ayaw pangomedya’g bomba

CEBU, Philippines - Nunot niining hugot nga pagpangandam ug higpit nga seguridad sa mga nagkadaiyang Law Enforcement Agencies alang sa selebrasyon sa Sinulog 2017 usa sa ilang gihatagan og pagtagad mao kining mga bombing incident nga nahitabo sa nagkadaiyang dapit sa nasud nga binuhatan sa teroristang grupo nga nagtinguhang motisok og kasamok.

Mihimo gani og simulation exercises ang kapulisan niadtong miaging adlaw mahitungod niini apan mikatap dayon sa social media nga Facebook nga niinsister nga tinuod nga adunay bombing incident sa Fuente Osmeña Circle, usa sa mga dapit nga gipahigayonan sa simulation exercise.

Nunot niini nanawagan ang kagamhanan sa siyudad sa Sugbo sa katawhan nga dili himuon nga binuang ang pagpamomba aron dili makamugna og kahadlok sa katawhan nga mao na hinuoy hinungdan nga magkagubot ug dunay mga maangol. Ang mga tawong mo-post og mga ingon niining mga bakak ug way kamatuoran dakpunon  subay sa balaod.

Kadtong madakpan tungod niini, dili makapiyansa hangtud nga dili mapamatud-an sa korte nga inosente kini sa pasangil.  Si Konsehal Dave Tumulak, Deputy Mayor for Police Matters mihangyo  karon sa katawhan nga dili kini buhaton kay makadugang na hinoon   kini sa kahadlok sa katawhan nga daan nang  nabalaka human sa nahitabong bombing incident sa Hilongos, Leyte.

“As much as possible, please mohangyo ta sa katawhan nga ayaw kay makadungag na hinoon kini sa kahadlok sa katawhan. And any calls receive sa command center consider as official call, emergency call so makagamit na sad ta ana og government resources and personnel luoy kaayo ang atong mga pulis,” hangyo ni Konsehal Tumulak.

Hinuon, ang konsehal miingon nga kun adunay mga ingon niining panghitabo dili angay mag-panic ang katawhan, magpabiling kalma, pokus ug magbinantayon kanunay.

Ang siyudad nipakatap na og emergency and safety tips sa tanang malls ug hotels aron sila maoy mangapud-apod niini sa publiko. Kahinumdoman nga sa nanglabay nga mga buwan human sa pagpamomba didto sa Davao City, adunay lima na ka mga tawo babaye ug mga lalaki ang nangapriso dinhi sa siyudad sa Sugbo tungod sa pagkomedya.

Lakip sa hinungdan sa ilang pagkapriso ang  ilang pagpangomedya dala ang pagka-pilosopo ngadto sa mga gwardiya sama sa pag-ingon: “duna silay dalang bomba,” duna say miinsistir sa gwardiya pagrekisa kaniya nga wala silay dalang bomba, ug aduna say usa nga giaresto kay nikomedya nga “basin duna siyay dala nga bomba.” Ubos sa Presidential Decree No. 1727 o  Anti-Bomb Joke Law, ang pagkomedya bahin sa bomba, eksplosibo, o ang pagbilin og mga butang nga ipatuong bomba kini mag-atubang og kaso ug posibleng mabilanggo ang tawong naghimo niini. (BANAT NEWS)