Ludo Power giawhag pagtabang sa mga scholars

CEBU, Philippines - Nisugyot si Cebu City Mayor Tomas Osmeña sa mga proponent sa giplanohang 300 megawatt coal-fired thermal power plant nga magbilin og bahin sa kwarta nga ilang ibubo sa proyekto ug ihatag kini sa 4 mil ka mga scholar.

Gi-propose ni Mayor Osmeña ngadto sa Ludo Power Corp. nga mohatag og usa ka libo ka scholarships ngadto sa upat ka barangay nga anaa duol sa power plant; ang Pasil, Sawang Calero, Suba ug Duljo-Fatima.

Matud sa mayor nga makahatag sila og P40 mil alang sa upat ka tuig nga pagpa-eskwela sa matag usa ka estudyante nga ipadala sa kolehiyo.

Lakip sa gisugyot ni Osmeña nga ihatag ang kwarta sa Ramon Aboitiz Foundation, Inc. aron sila na maoy bahala niini.

Iyang gitataw nga mas daghan pa sa 4 mil ka mga estudyante ang mahatagan og scholarship kay ang uban mo-drop out sa unang tuig pa lang sa kolehiyo mao nga ang dili magasto nga bahin sa P40 mil ihatag sa mga naghuwat nga anaa sa lista.

Dugang niini nga pinaagi sa maong proyekto, maluwas ang kaugmaon sa mga bata kun mosugot ang Ludo.

Alang niya nga kun magpahimulos ang Ludo, kinahanglan nga ilang bahinan sa ilang tinigum ang ilang mga silingan kay kun dili sila mosugot, dili sab niya tugotan ang maong proyekto.

Gibana-bana nga ang magasto sa power plant muabot sa $500 milyones.  (BANAT NEWS)