Giatangan nga mga indigay sa Sinulog

CEBU, Philippines - Sa nagsingabot nga kapistahan sa Balaang Bata Señor Sto. Niño daghan nga kalihukan nga giandam ang Sinulog Foundation Inc.(SFI) aron mas mabulukon ug malampuson ang kalihukan.

Dili lang pasundayag sa mga contingents gikan sa nagkalain-laing lugar ang mahimong atngan sa mga tawo nga mosaksi ug mosalmot sa kalihukan mapa-lokal man o langyaw tungod kay mahimo usab nilang makita ang mga maanindot nga mga panghitabo sa Sinulog pinaagi sa mga hulagway nga makuha sa mga maniniyot nga moapil unya sa Sinulog Photo Contest.

Gawas sa photo contest angay usab atangan ang Short Film Competition diin magbangga ang mga maayong mga direktor, artista, producer ug uban pa pinaagi sa pagbuhat og short film nga maghatag og leksiyon ug mga importanteng panghitabo nga may kalabutan sa Balaang Bata.

Sigon sa Executive Director sa SFI Ricky Ballesteros, sa pagkakaron wala pa silay impormasyon kun pila na ang miapil sa photo contest apan kini miingon nga ang mga gustong mosalmot adunay promo alang niadtong mga sayong magparehistro diin P1,500 na lang ang ilang bayran ug kadtong mga buwan sa Enero na magparehistro mobayad og P1,800.

Ang Photo Contest dunay nagkalain-laing categories nga naglangkob sa Contingents, Fluvial and Solemn Procession, Float, Puppeteers ug Higante, Décor, Lights and Sidelights Category ug Festival Queen.

Sama sa nakalabay nga tuig mao lang gihapon ang premyo sa mogawas nga mananaog sa maong contest diin ang grand prize kay P100,000.

Migawas nga mananaog sa Sinulog Photo Contest sa Sinulog 2016 First Place si Daniel Ybañez, Second Place si Josephus Tudtud ug 3rd Place si Teresito Ybañez.

Nasayran nga lakip sa angay atngan sa Sinulog 2017 mao ang Short Film, Documentary ug Music Video Contest nga gikahinaman gyud og maayo sa mga banggiitan nga mga film makers.

Sa Sinulog 2016 ang mananaog sa Short film category sa best picture mao ang “Igsuon” ni Christian Paolo Lat, Best Director si Remton Siega Zuasola sa “Lunch Box,” Best Actress usab si Dione Monsanto sa Lunch Box, Best Actor si Dante Luzon sa Amahan Ko, Best Supporting Actress si Janice Gimena sa Amahan Ko, Best Supporting Actor Ben Jayma sa Amahan Ko, Best Child Performer Shun Bacalla sa Igsuon, Best Screenplay/Story Ang Bitoon ug ang Barungoy ni Lindsey Banaynal, Best Cinematography ang Igsuon ni Dominic Lat, Best in Production Design ang Leyenda ni Eli Razo, Best Sound Engineering and Musical Scoring ang Igsuon ni Nikolo Salazar ug Shilton Calamba ug Best Editing ang Igsuon ni Christian Paolo Lat.

Sa Video Documentary ang Salamat Niño ni Ademar Ochotorena maoy Best Video Documentary, Best Story ang Anna Savage ni Hannah Gabiana, Best Direction ang Anna Savage ni Januar Yap, Best Cinematography ang Salamat Niño nila ni Ryan Carpio ug Ferdinand Chocoy Gonzales, Best Sound Engineering and Musical Scoring ang Anna Savage ni Wendel Ypil ug Best Editing ang Anna Savage ni Januar Yap ug Hannah Gabiana.

Samtang ang mga midaog sa Music Video mao sila si Razsil Zuasola ang Mabulukon Tang Isla nga maoy 1st place, 2nd place and Hinungdan sa Pagtuo ni Jay Arr Librando ug 3rd Place ang Super Señor Sto. Niño sa Fatboys.

Gikahinaman karong buwana kun kinsa ang mga mangapil sa maong mga nahisgutang kompetisyon. (BANAT NEWS)