Seguridad sa Miss Universe giandam
CEBU, Philippines - Hinay-hinay nang giplano sa Lapu-Lapu City Police Office ang pagbutang og seguridad alang sa umaabot nga Miss Universe swimsuit competition nga ipahigayon sa JPark Island Resort and Waterpark sa Brgy. Maribago karong Enero 17.
Si Police Chief Inspector Junnel Caadlawon, chief of operations sa LCPO miingon nga duna silay gipresentar nga security preparation didto sa Police Regional Office-7.
Nagkanayon ang opisyal nga gustong papun-an ni PRO-7 regional director Noli Taliño ang security detail sa siyudad diin sa matag 50 ka metros, dunay kapolisan nga magbantay sa kadalanan padulong sa nahisgutang resort.
"Wala pa ‘to na-satisifed si Regional Director (Taliño) kay iyaha pa papun-an kay iyaha gusto in every 50 meters gikan sa kalsada, naa gyud police makita," paambit ni Caadlawon.
Mipasabot si Caadlawon nga ang maong security set-up, susama ra sa security planning sa miaging Asia- Pacific Economic Conference.
Gawas sa pulis, moabag usab ang pwersa sa Philippine Navy, Philippine Air Force ug Bureau of Fire and Protection sa maong preparasyon.
Di pa makaingon si Caadlawon kung pila ka tawo sa LCPO ang i-deploy alang sa maong dako nga kalihukan kay kasamtangang namili pa siya kung kinsa sa mga personnel niini ang ipa-deploy.
"Nag-select lang mi og pipila ka personnel and then nangayo mi'g augmentation sa regional office para mo-compliment namo. Para ang among regular duties dinhi sa Lapu-Lapu, mapadayon gihapon," tataw ni Caadlawon.
Sa miaging report, una nang misulti si Mayor Paz Radaza nga walay ibubo nga gasto ang city government base sa gihatag nga mando ni Presidente Rodrigo Duterte tungod usa kini ka "separate activity" ug pagpanindot lang sa siyudad ang mahimo niini.
Nanghinaut si Radaza nga unta dali ra mahuman ang mga road repairs sa Department of Public Works and Highways didto sa dalan padulong sa resort, ilabi na sa dalan sa Brgy. Pusok nga adunay dalan padulong ug paggawas sa Mactan-Cebu International Airport.(BANAT NEWS)
- Latest
