Most Outstanding LGU ang San Francisco

CEBU, Philippines – Napiling Most Outstanding LGU ang lungsod sa San Francisco, Camotes atol sa gipahigayong awarding rites sa Our Cebu Program (OCP) sa probinsiya sa milabay’ng adlaw.

Ang San Francisco nakadawat og P1 milyon nga cash prize ug trophy diin ikatulong higayon na nila kining daug. Napili usab ang maong lungsod nga Best Heritage Work, diin nakadawat usab kini og P100 mil ug plake. Gawas niini napili usab ang maong lungsod nga usa sa tulo sa mga most child-friendly LGU sa probinsiya nga gisundan sa dakbayan sa Naga ug lungsod sa Liloan.

Ang dakbayan sa Talisay ug lungsod sa Pilar sa Camotes napili usab nga child-friendly LGU.

Si Gob. Hilario Davide, III midasig sa tanan nga mokooperar sa transformation sa Sugbo nga mahimo kining ideal nga lugar alang sa patigayon, trabaho ug leisure.

Subay niini, laing 12 ka lungsod ang nakadawat usab og special awards diin matag usa kanila dunay P300 mil nga cash prize.

Ang OCP mi-award usab sa top 15 performing barangays ug top 15 performing schools province-wide. Lima sa 15 ka top performing barangay gilangkuban sa Valladolid, dakbayan sa Carcar, Brgy. Santiago sa San Francisco, Brgy. Poblacion sa lungsod sa Liloan, Brgy. Putat sa Tuburan ug Brgy. Gairan sa dakbayan sa Bogo.

Ang 5 sa 15 ka top performing schools gilangkuban sa Mainit Elementary School sa dakbayan sa Naga, Bantayan Integrated School, Gibuangan Central School sa Barili, Camotes National High School sa San Francisco ug Compostela Central School.

Ang matag usa sa top 15 schools nakadawat og LED projector ug screen.

Si Bise Gob. Agnes Magpale nagkanayon nga tumong sa probinsiya pinaagi sa OCP mao nga ang Sugbo mahimo kining sustainable ug livable.

Dugang niini, ang OCP gilusad sa milabay’ng tulo ka tuig ubos sa pakigtambayayong sa Ramon Aboitiz Foundation, Inc. Ang mga criteria sa OCP mao nga ang LGU mipatuman sa green, livability, inclusiveness and competitiveness, historical and cultural, resiliency ug governance.

Ang mga girekomendar nga eskwelahan ug munisipalidad kaduha sa usa ka tuig ipaubos sa evaluation aron masiguro kun mipatuman ba kini sa mga criteria. - /DILT) (BANAT NEWS)