Duha patay sa drug bust

CEBU, Philippines - Patay ang duha ka mga gidudahang tigpayuhot og drugas human giingong nanukol sa mga polis atol sa buy-bust operation sa mga sakop sa Danao City Police diha sa Taboc, Camaligbato, Danao City niadtong nakalabay nga hapon.

Ang duha giila nga sila si Omar Espina, alyas Leomar, nagpuyo sa maong dapit nga maoy target sa mga polis ug ang iyang sinaligan sa negosyo nga si Rosipiyo Matugas.

Ang hepe sa Danao City Police nga si Sr. Insp. Alejandro Batobalonos nga nahinabi sa Banat News miingon nga una pa gilusad ang operasyon gi-surveillance nila ang kalihokan ni Espina.

Sigun pa ni Batobalonos ang duha parehong gipaubos sa Oplan Tokhang kaniadto apan wala mi-surrender.

Gamit ang P5,000 nga buy-bust money nakatunol og shabu si Espina apan kini dali nga midagan human nakabantay nga polis ang iyang nakaatubang.

Apan sa dihang gitawag ang duha aron mo-surrender kalit lang hinuon sila nga namusil sa mga polis hinungdan nga nahitabo ang pinusilay.

Ang duha dali pa unta nga gidala sa Cebu Provincial Hospital sa dakbayan sa Danao apan gideklara nga dead on arrival sa doctor.

Nakuha gikan sa duha ang usa ka .357 revolver ug usa ka .38 revolver nga dunay mga bala ug basiyo.

Lakip sa narekober sa mga polis ang mga pinaketeng shabu nga mokantidad og P59, 944.

Atol sa maong operasyon duha ‘sab ka mga tawo ang nadakpan nga nasakpan nga nagsuyop og shabu nga sila si Antonio Laum, 23, nga taga Lungsod sa Carmen ug Andre Gemino, 32, nga taga Sabang, Danao City.

Si Batobalonos miingon nga sa nakuha niya nga impormasyon nagagikan sa Dakbayan sa Sugbo ang supply sa shabu sa mga suspetsado.

Samtang patay usab ang usa ka 27- anyos nga lalaki nga anaa sa drug watch list sa kapulisan sa Danao City human kini gipusil sa gunman nga nagsakay og motorsiklo diha sa Highway Looc, Danao City, pasado ala una sa nakalabay nga kaadlawon.

Giila ang biktima nga si Anelo Giangan, nagpuyo sa maong dapit.

Daghang samad pinusilan sa lawas ang naangkon ni Giangan hinungdan nga kini nakabsan sa ginhawa samtang kini sulay pa unta nga gitabang.

Human sa pagpamusil dali sab nga misibat ang gunman sa wala masayri nga lugar. Nagpadayon ang imbestigasyon sa kapulisan sa maong krimen. (BANAT NEWS)