Osmeña gitugotan sa Konseho

CEBU, Philippines - Gitugotan sa konseho sa Siyudad sa Sugbo si Mayor Tomas Osmeña nga mag-emergency procurement sa service provider nga maoy molabay sa basura sa siyudad ngadto sa laing landfill.

Kini human, ang sakop sa Bando Osmeña Pundok Kauswagan nga konseho nakakuha og dakong boto atol sa gipahigayon nga botasyon tali sa mosyon ni konsehal Margarita Osmeña nga pagtugot sa mayor nga mohimo sa maong lakang.

Ang nisuporta sa maong motion, silang konsehal Sisinio Andales, Augustos Young, Eugenio Gabuya Jr, Alvin Arcilla, Mary Ann Delos Santos, ug ang duha ka independente nga opisyales nga si David Tumulak ug Nendell Hanz Abella. Tungod niini, pipila ka mga adlaw karon gikatakdang ang service provider na ang molabay sa basura ngadto sa laing landfill.

Apan wala pay ideya ang Executive Assistant to the mayor Francisco “Bimbo” Fernandez kun pila ang mabayran sa tipping fee matag tonelada sa basura.

Ang maong lakang sa siyudad gihimo aron masulbad ang problema sa paglabay sa basura human gi-isyuhan og cease and desist order ang gihimong transfer station didto sa SRP ug gisirad-an na ang Inayawan landfill. Sa gipahigayon nga special session kagahapon, mitunga usab ang mayor aron mohatag og eksplanasyon nganong mag-emergency procurement sa service provider.

Si Osmeña miingon nga kun dili kini aprobahan sa konseho mapugos siya sa paggamit sa transfer station sa SRP gihapon tungod kay dili siya kaako nga dili makolekta ang basura sa siyudad. Tungod sa yangungo sa mayor gipasar ang mosyon ni Andales sa pagtugot sa mayor nga mangita og legal nga transfer station.  Adunay sugyot nga naay bakanteng luna sa Inayawan nga pwedeng mamahimong transfer station.  Ang emergency procurement nagkantidad og P9.4 milyones. (BANAT NEWS)