Manaygonay sa kadalanan di pahatagan

CEBU, Philippines - Giawhag ni Bokal Thadeo Jovito “Jonkie” Ouano ang publiko nga dili manghatag sa mga street children ug mga manaygon diha sa kadalanan karong Pasko.

Awhag ni Ouano nga adto ihatag sa charitable institutions kung buot motabang.

Giawhag sab ni Ouano ang Department of Social Welfare and Development nga hingusgan ang mga programa niini aron matubag ang problema sa mga libud-suroy.

Si Ouano nabalaka sa kaluwasan sa kabataan nga manaygon ug magpalimos sa kadalanan sa wala paghuna-huna sa kapeligro.

Siya nidugang nga ang DSWD kinahanglan sab mohatag sa panginahanglan sa mga kabus nga kabatan-onan ug makig-alayon sa mga charitable institutions ug organizations. (Le Phyllis F. Antojado/GMR)

Pabuto daplin sa dalan gidili

Hugot nga gidili ang pagbaligya og pabuto daplin sa kadalanan sa Dakbayan sa Sugbo.

Hinoon matud ni Konsehal Dave Tumulak, chairman sa committee on public safety and order, nga hawan kaayo ang kadalanan dungan sa pagpasalamat sa kapolisan sa kakugi nga ilang gihimo aron pagseguro nga walay makalusot nga mga pabuto aron walay mabiktima sa pagsaulog sa Pasko.

Gitugot lang ang pagpamaligya og pabuto sa South Road Properties nga maoy firecracker zone sa siyudad.

Ang pangulo sa Cebu City Disaster Risk Reduction and Management Office, Nagiel Bañacia, nipahibawo nga hangtud sa Enero 1 ang pagpamaligya og pabuto sa SRP.

Samtang gawas sa pagbantay sa mga pabuto, dunay pahimangno si Tumulak sa katawhan ilabi na niadtong mga manghatag og pagkaon nga seguraduhon nga maayo pa ang ihatag nga pagkaon aron malikayan ang nahitabo sa mga residente sa Barangay Sirao nga giingong biktima sa food poisoning. (BANAT NEWS)