Osmeña di moestrikto sa pagpamaligya og pabuto

CEBU, Philippines - Dili estriktuhon ni Cebu City Mayor Tomas Osmeña ang pagpamaligya og mga pabuto sulod sa mga malls karon nga nagkaduol na ang Pasko ug Bag-ong Tuig ilabi na nga nahimo na kining kabahin sa selebrasyon.

Sigon pa ni Osmeña adunay duha ka nagkasumpaki sa pagsabot sa balaod kun angayan bang sakmiton o kun unsay angay nga buhaton.

Apan dili gihapon makabaligya bisan asa ang mga firecracker vendors. Sama sa naandan ang South Road Properties sa siyudad maoy firecracker zone diin adunay mga stalls nga ipamutang nga mapalitan og mga pabuto.

Mangayo pa usab og opinyon ang siyudad sa Department of Interior and Local Government (DILG) kun unsa gyuy desisyon sa gobiyerno mahitungod niining mga pabuto.

Usa sa mga hinungdan nga gitugutan sa mayor nga dunay mga pabuto nga ibaligya sulod sa mga malls kay matud pa niya mituo man siya sa free enterprise gawas na lang kung klaro ug tataw nga delikado kini.

Iyang gipasabot nga ang gobiyerno dili angay manghilabot sa negosyo sa mga tawo, buhaton lang nila kini aron pag-regulate alang sa kaluwasan sa  uban. (BANAT NEWS)